Intervista me Rodolf Byku: Nga “The Voice” në bashkëpunimin me producentin e njohur suedez dhe publikimi i “Light it up”

Rodolf Byku, i njohur me emrin artit si ROD, është një nga artistët që spikaten në The Voice of Albania 5. Pjesëmarrja e tij në The Voice edhe pse e shkurtër pati një ndikim shumë të mirë për fillimin e një karriere të sigurtë. Pikërisht pas perfundimit të The Voice për ROD nuk mbaroi gjithçka aty pasi ai spikati në mediat suedeze, nga ku dhe lidhi një kontratë muzikore me një producent të njohur suedez si Christian Oscarsson, i cili ka kompozuar këngën e suksesshme të Ardit Çunit – Let’s Go. ROD në këtë intervistë për IMA na ka treguar më shumë rreth këtij bashkëpunimi dhe projektet e tij për të ardhmen.

Si vendose për të marrë pjesë në The Voice?

Pjesëmarrja ime në The Voice lindi krejt spontanisht. Vendosa të plotësoj formularin online, nga ku më telefonuan për të zhvilluar audicionin e parë. Fillimisht mendoja që do ishte një eksperiencë si të tjerat, pasi kam marrë pjesë dhe në talent show të tjera por që doli komplet e kundërta…

Si e komenton eksperiencën tënde në The Voice, morre rezultatin që prisje nga ky format?

The Voice ishte dhe është një nga eksperiencat më të bukura që kam patur ndonjëherë deri më sot, dhe e kam shijuar në maksimum. Nga spektakli sigurisht që kam dalë i kënaqur, pasi fitova shumë profesionalizëm dhe njoha shumë miq të rinj. Për më tepër është thjesht një garë dhe duhet marrë me sportivitet.

A je zhgënjyer që nuk vazhdove më tej?

Nuk jam zhgënjyer aspak, pasi është thjesht një garë nga e cila mund të presësh çdo gjë, por që në fund fitimtarë dalim të gjithë.

299ae446-8309-4159-87a8-0f1de62caa3e Cili është momenti më i veçantë nga The Voice?

Nuk do e harroj kurrë momentin e audicionit të fshehur, ku të katërt anëtarët e jurisë e shtypën butonin për mua. Ai ishte një moment drithërues, të cilin e kam gjithmonë si një kujtim të bukur.

Si ishte të punoje me Jonida Maliqin?

Hmmm… Ishte shumë bukur të punoje me një nga divat e Shqipërisë. Kishim një komunikim të përsosur, dhe gjithmonë na këshillonte në mënyrë të mrekullueshme. Jam i lumtur që pata mundësinë të punoja me të.

6749a57e-078f-4b43-b18a-c22e8cc2bbd9

Si u bë së pari kontakti me kompaninë suedeze? Si të erdhi oferta për kontratë?

Kontaktet e para lindën para se të niste The Voice dhe në ate kohë kisha vetëm dy projekte, por pas The Voice projektet u shtuan dhe gjithashtu lidha dhe një kontratë me një shtëpi diskografike, PR WORLD.

Më pas cfarë ndodhi?

Më pas udhëtova për në Suedi, ku dhe realizova disa projekte të ndryshme dhe ku pata fatin të punoj me një tekstshkruese të famshme suedeze, Linda Sonnvik.

Sapo ke publikuar këngën “Light It Up”, a mund të na thuash se për çfarë flet kjo këngë?

“Light It Up” është kënga ime e parë dhe është shkruar nga Linda Sonnvik, me muzikë të Christian Oscarsson. Në këtë këngë flitet për ne, njerëzit, që ne jemi heronjtë e të sotmes dhe që shkëlqejmë sëbashku.

A do të kemi këngë te reja pas Light it Up?

Sigurisht, në sezonin e verës po mendojmë të vij me një stil paksa ndryshe, por është surprizë.

Çfarë mesazhi do të kishe për të gjithë lexuesit?

Ju ftoj të ndiqni këngën time dhe të ndjeni dhe ju veten tuaj në të.

 

Copyright IMAlbania.com / Intervistoi: Erdi Tejeci

REKLAMA
loading...

1 Koment

KOMENTO

This site uses Akismet to reduce spam. Learn how your comment data is processed.