Programi “Jo vetëm modë”, që transmetohet në ekranin e Televizionit Klan, në bashkëpunim në organizatën “Fundjavë ndryshe”, ka udhëtuar drejt Bërxhullit, në familjen Balliu, që jeton në varfëri ekstreme, e ku e vetmja që punon është nëna, e cila mban me bukë tre fëmijë të vegjël.
Në mungesë të kryefamiljarit, i cili është në burg, Fadili, Oresti, Jetoni dhe nëna e tyre Manushaqja jetojnë duke sfiduar mbijetesën, në një shtëpi në kushte të tejskajshme.
Kësaj familjeje u janë sjellë ushqime, veshmbathje, lodra dhe dhurata, që ata nuk kanë patur mundësinë t’i kenë kurrë.
Emocioni në sytë e tyre është i parrëfyeshëm.
Manushaqja, nëna që sfidon skamjen, punon për t’u dalë zot fëmijëve të saj, duke u përpjekur që t’i sigurojë bukën në tryezë.
Ajo tregon se prej 7 vitesh jeton në këtë shtëpi dhe se, që prej ditës që e kanë ndërtuar, nuk kanë mundur të bëjnë asnjë rregullim. Mobiljet e shtëpisë janë të gjitha të falura.
Ajo punon tokën duke mbjellë perime, ndërsa fëmijët i mban gjithmonë pranë vetes sepse ka frikë për ta.
Por si të mos mjaftonte fakti që kjo familje banon në një shtëpi që vetëm emrin ka të tillë, së bashku me fëmijët dhe nënën, jetojnë dhe kafshët. Kjo për faktin se Manushaqja ka frikën e grabitësve, prej të cilëve ka rënë pre.
Ajo tregon edhe tmerrin kur një herë gjeti një gjarpër në tualet.
Një familje që jeton në borxhe dhe asistencën prej 5000 lekësh që merr nga shteti, e lë për të paguar borxhet në ushqimore.
Prej trishtimit të madh, Manushaqja rrëfen me zemër të hapur se ka tentuar dhe të vrasë veten.
Për të, që çdo ditë është luftë për mbijetesë, shqetësimi më i madh është që të rrisë fëmijët e saj, t’i arsimojë ata.
“Jo vetëm modë”, së bashku me “Fundjavë ndryshe”, shpresojnë që publikimi i këtij rasti të arrijë të rikonstruktojnë shtëpinë e familjes Balliu, që të bëjnë një izolim të shtëpisë, një sistemim të çatisë, instalime hidraulike dhe elektrike, një shtrim me pllaka dhe mobilje. Kjo familje pret një dorë që ta ndihmojë, që këta fëmijë të rilindin në një botë me më shumë shpresë./tvklan.al
