“Pardon My French” dhuroi sot për gjithë dëgjuesit e Top Albania Radio një atmosferë shumë të bukur dhe pafund energji pozitive. Nën moderimin e Elona Duro dhe me të ftuar katër prezantuesit e “Festivalit të Këngës” Xhemi, Isli, Jonida dhe Kelvie puntata e sotme ishte plot surpriza.
Ndryshe nga tre moderatorët, për Jonidën kjo nuk është hera e parë që ngjitet në skenën e Festivalit. Ajo ka qenë edhe pjesëmarrëse si këngëtare dhe na ka përfaqësuar denjësisht në “Eurovision”. Por, si e priti ftesën për të prezantuar Festivalin këtë vit?
“Do ta prezantoj për të dytën herë. E kam prezantuar para… Nuk e mbaj mend vitin, më shumë se 10 vjet më parë. Nuk e mbaj mend se ku isha këtë vit kur mora ftesën por pashë që i kishin rënë telefonit Martin Leka dhe Ardit Gjebrea. Mora Martinin, por m’u përgjigj Arditi. Padyshim që doja të dija prezantuesit, doja të dija mos kisha ndonjë surprizë të pakëndshme. Me prezantuesit e përzgjedhur shkojmë mirë dhe prapa kamerave, kemi kimi.”
E pyetur se si e sheh këtë eksperiencë, Jonida tha se për herë të parë nuk ka emocione pasi ka besim te bashkëprezantuesit që do ketë në krah.
“Për të parën herë nuk po më dridhen gjunjët, ashtu siç ndodh me këngëtarët kur shkelin në skena të mëdha me kalimin e viteve. Edhe nëse harroj disa paragrafë në skenë, do më nxjerrin nga situata kolegët. Jam në ‘comfort zone-in’ tim. Kemi kuptuar deri diku formatin, nuk do të jetë klishe, por pak më rinore.”
Ndër të tjera, Jonida tha se do të donte të rikthehej në “Eurovision”, ashtu si çdo artist tjetër.
“Unë tashmë në gjithë Festivalet i kam prekur çmimet. Ama kur e prek Eurovision-in, do t’i rikthehesh. Çdo artist që merr pjesë në Festival do të fitojë. Do të gënjeja nëse do të thoja thjesht po marr pjesë, do të doja të isha sërish pjesë e Eurovision-it.”
Se kur do ndodhë kjo nuk e dimë, por mezi po presim të shohim Jonidën si prezantuese këtë vit.
