Vetëm pak kohë pasi u shfaq me emisionin e mëngjesit në ORA TV, Kelvi Kadilli ka vendosur të largohet nga moderimi i këtij emisioni, madje dhe nga bota e televizonit.
Ditën e sotme në programin “Ditë e Re” ai ka njoftuar se do të largohet nga televizioni duke prezantuar dhe zëvendësuesin e tij të ardhshëm që do të moderojë krahë Arjola Shehut, Arjon Muçën.
Ndërkaq Kelvi ka bërë me dije dhe arsyet e largimit nga televizioni: “Do të nis një angazhim të ri, që nuk ka lidhje me televizionin, por me biznesin. Lidhet me pasionin tim të ri, prandaj pas mbledhjeve të shumta me stafin, vendosëm të gjenim një figurë mashkullore që të më zëvendësonte mua”, ka thënë ai.
Kelvi Kadilli është një ndër moderatorët më të njohur në ekranin shqiptar. INtv ishte televizioni ku Kelvi u shfaq për herë të parë me formatet e tij të intervistave dhe më pas në Top Channel në “Pop Culture”.
Më herët, në nisjen e sezonit të ri televiziv, ai është shfaqur në Ora TV.
