Veprimtaria më prestigjioze e klubeve të kontinentit në futboll, Liga e Kampioneve, që është një tjetër ekskluzivitet madhor sportiv i Rrjetit të Radio-Televizionit Shqiptar, rikthehet këtë mesjave me 6 duelet e “play-off”-eve, 3 prej të cilave luhet të martën e 3 të mërkurën, të gjitha duke nisur nga ora 21:00. Kështu, të martën, kampionia e Hungarisë, Ferencvaroshi, do të synojë të përmbysë atë humbje 2-3 të pësuar të mërkurën e shkuar në Zvicër, përballë Jang Bojs të Bernës.
Sulmuesi shqiptar, Myrto Uzuni, humbi një 11-metërsh në atë takim për hungarezët. Ndërkaq, me misionin përmbysje janë edhe dy skuadrat e tjera të martën, teksa PSV-ja e Eind’hovenit pret në Holandë Benfikën, me portugezët që e kanë fituar 2-1 ndeshjen e parë, ashtu sikundër Malmoe udhëton drejt Bullgarisë, ku do të ndeshet me Ludogoretsin e Razgradit, pasi e ka fituar 2-0 ndeshjen e parë. 3 takimet e tjera luhen të mërkurën dhe Dinamo e Zagrebit do të synojë përmbysjen e humbjes 0-3 në Moldavi në ndeshjen e parë, kur të presë Sherifin e Tiraspolit.
Edhe Brondbi e ka humbur ndeshjen e parë, 1-2 në Austri, dhe synon përmbysjen kur të presë në fushën e vet Salcburgun. Takimi më i spikatur i mbrëmjes është ai që do të luhet në Ukrainë, midis Shahtjorit të Donjeckut dhe Monakos, dhe që do të sillet për sportdashësit drejtpërdrejt nga Rrjeti i Radio-Televizionit Shqiptar në kanalin RTSH 1. Vendasit e kanë fituar me një gol të vetëm takimin e parë, të luajtur në Francë dhe do të synojnë ta mbrojnë këtë fitore edhe në shtëpi përballë skuadrës së Principatës.
Liga e Kampioneve
Ndeshjet e kthimit të “play-off”-eve
24 gusht 2021:
21:00 Ferencvarosh – Jang Bojs Bernë
21:00 Ludogorets Razgrad – Malmoe
21:00 PSV Eindhoven – Benfika
25 gusht 2021:
21:00 Brondbi – Salcburg
21:00 Dinamo Zagreb – Sherif Tiraspol
21:00 Shahtjor Donjeck – Monako
