Mal Retkoceri është fitues i çmimit të parë në Festivalin e 62 të këngës në RTSH me këngën “Çmendur”. Mes emocionesh ai u shpreh pas ngritjes së kupës së Festivalit se ndjehet shumë i vlerësuar nga çmimi.
“Shumë faleminderit, shumë faleminderit jurisë. Këngën e kam bërë prej zemrës. E kam interpretuar prej perspektivës së një personi që e dua shumë, prej nënës sime. E kam shkruar për të gjithë ata persona që janë të shkelur prej personave të tjerë dhe që i përdorin për sende personale të tyre. E mira dhe e vërteta, del”, u shpreh Retkoceri.
Çmimi i dytë i Festivalit u fitua nga Tiri Gjoci me këngën “Në ëndërr”. Pas marrjes së çmimit Gjoci deklaroi se ndihej shumë i emocionuar.
“Faleminderit shumë. Kemi qenë një grup që e kemi bërë këngën me shumë dashuri”, u shpreh Gjoci.
Ndërsa këngëtari Shpat Deda fitoi çmimin e tretë me këngën “S’mund të fitoj pa ty”.
Ai shprehu shumë falenderim për vlerësimin që i dha juria.
“Jam i emocionuar. Falenderoj edhe Orkestrën e RTSH-së, si dhe audiencën time që më ka ndjekur ndër vite”, tha Deda.
PeterPan Quartet me këngën “Edhe një herë” kanë rrëmbyer Çmimin e Debutantit më të mirë në Fest 62. Çmimi u dorëzua nga pianistja Anila Aliu.
Ndërkohë, këngëtarja Martina Serreqi ka fituar çmimin e kritikës. Çmimin e ka akorduar këngëtari i njohur Indrit Mesiti, i cili ishte pjesë e jurisë së Fest 62.
“Jam shumë e emocionuar, faleminderit shumë për duartrokitjet, faleminderit orkestra, faleminderit edhe ata që nuk më kanë ndjekur sot”, u shpreh e emocionuar këngëtarja Martina Serreqi.
