Mbyllja e transmetimeve analoge, AMA ndryshon sërish afatin për qarkun e Beratit!

Autoriteti i Mediave Audiovizive (AMA) nëpërmjet një deklarate për shtyp ka njoftuar ndryshimin e datës së afatit për mbylljen e transmetimit analog në qarkun e Beratit. Ndërsa ishte njoftuar më parë nga vetë autoriteti  se data 3 Korrik 2017 do të niste epokën e transmetimit të televizionit digjital, AMA në zbatim të ligjit nr. 97/2013 “Për mediat  audiovizive në Republikën e Shqipërisë”, i ndryshuar, njofton se afati përfundimtar për mbylljen e transmetimeve analoge në qarkun e Beratit do të jetë data 15 Gusht, 2017.

 

Për sa më sipër, AMA tërheq vëmendjen e të gjithë subjekteve audiovizivë që ushtrojnë veprimtari televizive analoge në qarkun e Beratit, në marrjen e masave për të mbështetur programin e tyre në rrjetin numerik të RTSH-së, ose në njërin prej rrjeteve numerike kombëtare të licencuara nga AMA.

 

Nga ana tjetër, AMA kërkon nga publiku i cili përfiton transmetimet televizive nëpërmjet teknologjisë analoge, të pajiset me marrës digjital (dekoderë universalë të tipit DVB-T2), pasi në të kundërt, mbas datës 15 Gusht 2017, nuk do të mund të shohë më transmetime televizive në këtë qark.

REKLAMA
loading...

KOMENTO

This site uses Akismet to reduce spam. Learn how your comment data is processed.