Mentor Haziri u bë kryetitull në mediat rozë dy vite më parë për shkak të komentit të tij për performancën e Fifit dhe Mc Kreshës në “Këngën Magjike”. Ai tha se ajo ishte performanca më e dobët e festivalit dhe se stonatura ka qenë e jashtëzakonshme. Haziri e votoi me vetëm 4 pikë këngën e famshme të dyshes, e cila në fakt u kthye në një ndër baladat më të preferuara.
Përplasja virtuale mes tij e Fifit vazhdoi e debati shkaktoi bujë në media, por Mentori ngriti flamurin e bardhë të paqes me Fifin në 2020 kur ishte i ftuar në “Shiko kush luan”. I pyetur se përse nuk flet me kolegen e tij dhe nëse do pajtohej me të, ai tha: “Jemi përshëndetur kur kam ardhur këtu. Nuk është e vërtetë që nuk flasim, ajo është shumë e talentuar”, tha Mentori. Më pas ai u përqafua me Fifin, por kjo e fundit nuk dukej shumë entuziaste.
Mirëpo, ditën e sotme duket se Mentori “i ka hapur sërish llogaritë e vjetra”. I ftuar në “Abc e Mëngjesit” me moderatorin Alban Musa ai u pyet lidhur me sherrin e bujshëm. Mirëpo habiti me deklaratën e tij pasi u shpreh se nuk donte t’i bënte reklamë dikujt tjetër të parëndësishëm.
“Është shumë i parëndësishëm dhe nuk dua t’i bëjë reklamë dikujt tjetër të parëndësishëm. Është i parëndësishëm, ndoshta nivel shumë i ulët i asaj bisede”.-tha Mentori.
Deklarata e tij nuk pritej pas përqafimit në “Shiko kush luan”. Nuk dimë të themi nëse mes tyre ka ndonjë hatërmbetje tjetër, apo Mentori ka ndryshuar mendim për të, teksa Fifi ende nuk ka reaguar.
