Mentor Haziri i revoltuar pasi kënga e tij nuk u pranua Festivalin e Këngës, shkroi një deklaratë në rrjetet sociale që bëri jo pak bujë. Këngëtari mes rreshtave fliste për një lloj ndasie me bazë kombëtare, duke thënë se “juria i frikësohet një shqiptari të Kosovës” apo se “ai festival nuk i shqiptarët e Kosovës”.
Kaq u desh që njerëzit ta kritikonin, duke i shprehur zhgënjimin e tyre ndaj tij për një deklaratë të tillë.
Pas komenteve të shumta, Haziri bëri një tjetër postim ku sqaronte se ajo çfarë tha nuk ka lidhje me dashurinë e tij për Shqipërinë.
“Për të gjithë ata që mendojnë se unë po bëj ndasi kombëtare dhe ata që shajnë…Kosova dashurinë ndaj Shqipërisë e ka pa hile, jo rastësisht e gjithë shoqëria ime ka emrat e qyteteve shqiptare si Berati, Saranda, Durrësi, Shkodra, etj. Dhe dashurinë time ndaj Shqipërisë, jo ky festival, por asgjë tjetër nuk e zbeh. Shumë gjyshër vdiqën për Shqipërinë dhe ajo është e vulosur, Shqipëria duhet ta dojë Kosovën me të njëjtën monedhë sepse dashurinë ndaj saj e kemi pa hile.”- shkruan ai ndër të tjera.
Mesa duket, kënga e tij është shkruar dhe orkestruar nga profesionistë të muzikës nga Irlanda dhe nuk u pranua në Festival pa marrë asnjë arsye, prandaj këngëtari pretendon për diskriminim sepse “asnjë nga Kosova nuk është konkurrent” këtë vit.
“Në të kaluarën më kanë thënë që është festival i ndyrë dhe i zhytyr në korrupsion, ku kënga shitet me pazare nëpër korridore shumë kohë para – kurrë nuk kam besuar sepse jam rritur duke e parë atë Festival me këngëtarë të vjetër e ikona të asaj kohe.”- shkroi ai në një postim më të hershëm.
Revolta e tij u kundërshtua prej shumë njerëzve, përfshi këtu Anxhela Peristerin dhe Alban Ramosajn, të cilët kanë qenë gjithashtu pjesë e Festivalit të Këngës.
