Strukturat e Inspektoriatit Kombëtar të Mbrojtjes së Territorit (IKMT), ndërhynë sot për rikthimin e 4000 metrave katror rërë e det të kthyera në beton dhe ndërtime të paligjshme në zonën e pishave, nga Irfan Hysenbelliu.
Pavarësisht servilosjes së ditëve të fundit të Irfanit ndaj qeverisë, duke ndryshuar politikat editoriale të mediave të tij dhe zbutjen e sulmit ndaj tatimeve për gjobat e papaguara, ligji u vonua por i erdhi sot për t’i “trokitur” në derë dhe për t’i prishur gjithçka.
“Prestige Resort” i ndërtuar pak vite më parë depërtoi jo vetëm në breg, në rërë, por edhe në det. U vendosën blloqe betoni duke penguar shëtitoren, si të ishte personale e Irfan Hysenbelliut. IKMT shkoi të hapë pronën publike për të cilën ishin ankuar dhjetëra qytetarë me peticione.
Shkeljet e Irfanit janë të pafundme, por ky hap fillestar është diçka pozitive, që shpresojmë të vazhdojë njësoj me të gjitha shkeljet e tjera, që ne do të vazhdojmë t’i denoncojmë siç kemi bërë gjithmonë.
Nëse vendi jonë ka standard ligji, Hysenbelliu duhet të arrestohet për ndërtimin që ka bërë dhe duhet të ishte arrestuar shumë më herët për të gjitha shkeljet e tij! Në fakt, ku ishte Policia e Shtetit kur Irfani ndërtonte pa leje dhe shkelte çdo ligj? Ku ishin institucionet e tjera që duhet të mbanin përgjegjësi?
“Iconstyle.al” mban qëndrim kundër qeverisë për mos-zbatimin e ligjit gjithë këto vite, duke e lënë bregdetin shqiptar të mbushet me ndërtime teksa toleronte Irfanin dhe të tjerë.
Mediat gjobvënëse të Hysenbelliut që e quajtën këtë ngjarje si “sulm ndaj linjës së tyre editoriale” nuk arritën dot t’i bëjnë presion qeverisë, ndërsa tashmë mbetet për t’u parë “presioni” i pjesës tjetër që qeveria ka toleruar për kaq kohë që të shkatërrojë bregdetin.
Fytyra e vërtetë e opozitës!
Prej 9 vitesh shohim qartë fytyrën e qeverisë, por sot pamë qartë edhe fytyrën e vërtetë të opozitës, që e ktheu këtë çështje në politike.
Megjithëse për të vetmen herë qeveria e bëri punën siç duhet duke zbatuar ligjin edhe pse me vonesë, opozita (Partia e Lirisë, Partia Demokratike) u ngrit për t’i dalë kundër dhe për të mbrojtur ndërtimet e Irfanit, kur nuk ngrihen as për problemet më serioze të popullit të tyre, siç u takon!
Shumë herë kemi parë opozitën të heshtë, të shitet, duke mos denoncuar me emra oligarkët dhe shkeljet e tyre të mëdha. Opozita e quan këtë një “sulm kundër mediave”, por në fakt nuk është i tillë! Ky është një sulm kundër mediave që përdoren për gjoba dhe për të shkelur ligjin, si ajo e Irfanit. Ky është një zbatim i ligjit të IKMT-së për të shtruar shëtitoren dhe për të prishur ndërtimet pa leje në bregdet, të ndërtuara nga një pronar mediash që është mësuar gjithmonë të vendosë gjoba për interesat e tij.
Në Shqipëri operojnë gjithashtu media transparente, të drejtpërdrejta dhe të pavarura, që nuk mbajnë anën e askujt dhe sulmojnë çdo shkelje. Mediave të tilla transparente, qeveria nuk mund t’ia bllokojë financimet dhe s’kanë pasur kurrë probleme të tilla, ndryshe nga mediat e Irfanit.
Shpresonim që Hysenbelliu të fillonte të bënte opozitë siç duhet, ta përdorte median e tij për qëllimin e saj të vërtetë. Por ka aq shumë probleme, sa e kërcënojnë që edhe të arrestohet e t’i sekuestrohet gjithçka.
Opozitarët duke protestuar e mbështetur Irfanin sot, treguan se janë në mbrojtje të paligjshmërisë, të abuzimit me ligjin, të ndërtimeve pa leje, kur në fakt duhet të ishin të parët që duhet të duartrokisnin mbështetjen ndaj institucioneve në momentin kur çlirohet prona publike e rrëmbyer nga Hysenbelliu.
Me këtë qasje, opozita vërteton se nuk e meriton të vijë në pushtet dhe të vazhdojë po njësoj lejimin e ndërtimeve pa leje dhe mos-zbatimin e ligjit. Kjo opozitë nuk na shërben dhe s’ka ç’të na ofrojë. E vetmja gjë që po bën, është t’i zgjasë mandatin kësaj qeverie problematike. Opozita sot vërtetoi se është njësoj si qeveria dhe është po njësoj siç ka qenë vite më parë, kur ishte në pushtet.
A është i ligjshëm aksioni i IKMT-së?
Sipas ministrisë, aksioni i IKMT-së që ka nisur këtë mëngjes, është i ligjshëm.
“Pretendimi i mediave të zotit Irfan Hysenbelliu se ndërhyrja e sotme e IKMT është e paligjshme pasi resorti paska leje të miratuar është një tjetër manipulim i opinionit publik. Dokumenti i nxjerrë në mediat në fjalë me firmën e kryeministrit Edi Rama si kryetar i KKT provon të kundërtën e pretendimit. Leja është një leje me kusht, ku thuhet qartësisht se dokumenti i lejes së ndërtimit do të jepet vetëm pasi tē plotësohet dokumentacioni tekniko-ligjor dhe të paguhen taksat përkatëse. Asnjëri nga kushtet nuk është plotësuar dhe sot zoti Irfan Hysenbelliu i detyrohet shtetit dhe qytetarëve kthimin e sipërfaqeve të zaptuara si edhe borxhin financiar nga mospagimi i taksave,”- shkruan Ministria e Brendshme.
