Të gjithë e kanë kuptuar tashmë pikën e dobët të Bert Alisë dhe nëse do që vërtet ta qetësosh, foli për fëmijët, afroji një fëmijë dhe zemra i bëhet copë. Pastaj, nëse është fjala për fëmijët e tij, as lotët nuk i përmban dot.
Jashtë skenës së DWM dhe jashtë rebelizimit me të cilin jemi mësuar, profili i Bertit para fëmijëve është i adhurueshëm, i pamatshëm, i ndjerë.
I ftuar pasditen e sotme në “Rudina”, për të promovuar projektin e tij të ri, albumin me foto “Tirana horizontale”, Berti u përball edhe me disa surpriza, pas të cilave, ai e pati të vështirë t’i përmbajë lotët.
Ndërsa në ekran iu shfaq një moment nga një kujtim i bukur në skenën e DWM, kur këndoi “Dashuria”, një prej hiteve të tij me vajzën Gala, Berti e pati të vështirë t’i mbajë emocionet. As syzet nuk ia fshehën dot lotët nga kjo surprizë e papritur: “Më vutë në pozitë shumë të vështirë. Nuk është malli ai që e bën këtë gjë, sepse për të më merr malli edhe kur është 8 orë në shkollë, e pres me padurim”, – tha ai duke u përpjekur të kontrollojë dridhjet e zërit.
“I kam dobësi fëmijët, edhe fëmijët e mi në veçanti. Galës, edhe natën do i jepja biberonin, s’kishte shans mamaja t’i afrohej, ishte një kënaqësi më vete, kam shijuar çdo moment me të. E çoj në shkollë, e marr në mëngjes, e çoj në paino, ajo është shumë e zënë.”
Pak pas kësaj, vjen edhe një video surprizë për Bertin nga vajza 12-vjeçare, e cila e përshëndet nga Belgjika dhe i thotë se i mungon shumë.
I zënë ngushtë dyfish, Berti tha se ishte një surprizë e veçantë: “Është një mrekulli që më bën të jetoj. I lutem Zotit që të më japë sa më shumë vite që të kem kohë të rri me të” – tha ai pas kësaj surprize që do ta mbajë mend gjatë.
