E ka nisur me një denoncim korrupsioni rrugëtimin e tij emisioni investigativ “STOP”, në ekranin e Televizionit Klan.

Dyshja e prezantuesve, Saimir Kodra dhe Gentian Zenelaj, kanë sjellë një rast korruptiv në Qendrën Kombëtare të Licencimit.

Në videon e transmetuar mbrëmjen e së hënës në emisionin e parë të këtij programi, duket Shefi i Specialistëve në Qendrën Kombëtare të Liçencimit, që i kërkon 3 mijë euro një qytetari, i cili ka hapur një biznes zgare dhe që kërkon të marrë një leje mjedisore.

Në skemën korruptive është i përfshirë edhe një specialist mjedisi, i cili thotë se ky nuk është rasti i parë korruptiv në këtë institucion.

Aty pranohet se si janë të përfshirë institucione si Bashkia e Tiranës, Drejtoria Rajonale e Mjedisit, Instituti i Shëndetit Publik dhe Qendra Kombëtare e Liçencimit.

Emisioni “STOP” do të vijojë me denoncimin e rasteve të tjera investigative. Ai transmetohet nga e hëna në të premte në Televizionin Klan, në orën 20:05.

Marre nga Tv Klan