Në një kohë kur hapësirat për diskutim të shëndetshëm dhe përfshirje qytetare po bëhen gjithnjë e më të kufizuara, një nismë e re vjen si përgjigje ndaj nevojës për të rritur ndërgjegjësimin dhe angazhimin e të rinjve në jetën publike.
Shoqata LIBURNETIK ka lançuar projektin “UNI Debate: Skena e Mendimit Kritik”, një program kombëtar që do të zhvillohet përgjatë 10 muajve në 7 universitete të vendit. Projekti financohet nga Agjencia Kombëtare e Rinisë (AKR) dhe Ministria e Shtetit për Rininë dhe Fëmijët (MSHRF), si pjesë e mbështetjes për organizatat rinore në kuadër të Thirrjes së IV për Rininë.
Qëllimi? Të fuqizojë të rinjtë si qytetarë aktivë, të aftë për të menduar në mënyrë kritike, për të komunikuar qartë dhe për të kontribuar realisht në komunitet.
Nëpërmjet një metodologjie ndërkombëtare – debatit Lincoln-Douglas – studentët do të përfshihen në një proces intensiv trajnimesh, diskutimesh dhe debatimi mbi çështje me rëndësi sociale, politike, ekonomike dhe filozofike. Temat përzgjidhen me kujdes nga një grup ekspertësh, ndërsa trajnimet dhe raundet e debatit do të zhvillohen në bashkëpunim të ngushtë me pedagogët dhe stafet universitare.
“UNI Debate nuk është thjesht një projekt debati,” – u shpreh koordinatori i komunikimit të projektit, Kreshnik Lako. “Është një platformë që nxit të rinjtë të reflektojnë, të sfidojnë idetë dhe të shprehin veten me përgjegjësi në një mjedis demokratik. Në një kohë kur diskursi publik shpesh dominohet nga polarizimi dhe pasiviteti, studentët tanë po mësojnë se si të flasin – dhe të dëgjojnë.”
Projekti synon të përfshijë 160 studentë si përfitues të drejtpërdrejtë dhe mijëra të rinj të tjerë si përfitues të aktiviteteve publike dhe përmbajtjes digjitale që do të krijohet gjatë procesit.
Kjo nismë vjen si vijimësi e përvojës së LIBURNETIK në organizimin e kampionateve të mëparshme të debatit, të cilat janë vlerësuar nga institucione vendase dhe ndërkombëtare si një model i suksesshëm i edukimit qytetar dhe ndërgjegjësimit social.
Për më shumë informacione mbi projektin dhe aktivitetet që do të zhvillohen, vizitoni www.liburnetik.org ose ndiqni @liburnetik në rrjetet sociale.Ky projekt zbatohet me mbështetjen e AKR-së dhe MSHRF-së dhe është pjesë e programit të granteve shtetërore për rininë 2024.
