Revista Time ka hedhur poshtë versionin e presidentit amerikan Donald Trump, sipas të cilit ai refuzoi kërkesën për një intervistë dhe foto në prag të edicionit të pritshëm ku edhe do të shpallet personi i vitit.
Të premten, Trump në një postim në Twitter, kishte bërë të ditur se Time i kishte telefonuar duke i thënë se ndoshta ai do të shpallej personi i vitit. Por, më pas, Time tha se presidenti nuk ishte korrekt për çka kish thënë.
Trump i është akorduar ky titull vitin e kaluar. Më herët, ai në mënyrë të rreme kishte pretenduar se ishte shfaqur në kopertinat e revistës Time. Në qershor, Uashington Post zbuloi se në disa nga klubet e golt të Trump, shfaqej një kopje e rreme e kopertinës së revistës Time, me tituj pozitivë dhe foton e Trump. Kjo e fundit, e ka nisur traditën e shpalljes së personit të vitit në 1927 dhe shfaq në kopertinë personin që për të mirë apo për të keq ka pasur më shumë ndikim në ngjarjet e vitit.
Revista Time tha se nuk do të bëjë komente për përzgjedhjen e saj të këtij viti deri sa edicioni i radhës të dalë në treg dhe se vendimi i saj do të mësohej më 6 dhjetor.
Revista fton lexuesit e saj të votojnë për personin që ata mendojnë se duhet ta mbajë këtë titull, por vendimi përfundimtar i takon botuesve.(tch)
