Procesi i dixhitalizimit të programeve televizive, një detyrim i Shqipërisë ndaj BE, që duhet të përfundojë më 17 qershor të këtij viti, rezulton i bllokuar.
Përfaqësuesit e shtetit shqiptar dhe ata të kompanisë që ka fituar tenderin, Rohde&Schwartz, kanë rënë dakord për gjithshka, me përjashtim të dy çështjeve të rëndësishme të kontratës për ndërtimin e rrjeteve numerike (dixhitale) të operatorit publik RTSH.Fjala është, së pari, për shlyerjen e detyrimeve financiare të fazës së dytë të projektit në fjalë, si dhe përputhshmërinë e kohëzgjatjes së implementimit të projektit me dokumentat e tenderit. Dhe, së dyti, lidhur me atë se kush duhet të paguajë TVSH-në dhe detyrimet doganore.
Kohëzgjatja
Radiotelevizioni Shqiptar, nëpërmjet një shkrese drejtuar ministers Milena Harito, ka bërë me dije se ai, me të ardhurat e veta, nga taksa televizive dhe fondet buxhetore, që konsiderohen si të ardhura të sigurta, mund të garantojë projektin vetëm në rast se palët bien dakord për një shtyrje të pagesave për fazën e dytë të projektit në një periudhë 10-vjeçare, nga viti 2015 deri në vitin 2024.
Për këtë arsye, RTSH kërkon një garanci financiare nga qeveria, që të mbulojë gjithë kohën e projektit.
TVSH e doganat
Problemi i dytë ka të bëjë me faktin se çdo material e pajisje që hyn në Republikën e Shqipërisë është subjekt i pagesës së Tatimit mbi Vlerën e Shtuar dhe taksave të ndryshme doganore. Të gjitha këto, në total, do të përbënin një shumë prej 4 milionë eurosh, sipas llogaritjeve të kompanisë fituese të tenderit për dixhitalizimin.
As RTSH dhe as kompania fituese Rohde&Schwartz nuk kanë pranuar gjatë negociatave që të paguajnë këto detyrime.
Kolapsi
Për ministrinë e Financave, e cila është vënë në dijeni të kësaj problematike, legjislacioni fiskal në fuqi nuk parashikon përjashtime nga taksat dhe tatimet për furnizime mallrash, edhe në rastin kur fjala është për projekte që kanë lidhje me institucione buxhetore në rast prokurimi. Pra, për qeverinë, është e detyrueshme që TVSH dhe taksat e ndryshme doganore të paguhen.
Nga ana tjetër, edhe Financat konstatojnë se RTSH ka fuqi financiare vetëm për të mbuluar fazën e parë të projektit dhe sidomos për periudhën 2015-2017 nuk ka mundësi të mbulojë shpenzimet.
Zgjidhjet
Përjashtimi nga TVSH-ja bëhet vetëm me amendim në ligj, pra kërkohet angazhimi i Kuvendit për këtë rast specifik. Pa këtë ndërhyrje ligjore, projekti mund të bllokohet.
Veç kësaj, RTSH propozon që ose e gjithë shuma të mbulohet që në fillim me garanci qeveritare, që do të shlyhej gradualisht nga Radiotelevizioni (21.6 mln euro), ose 12 milionë euro të garantoheshin për fazën e parë dhe 9 milionë për fazën e dytë. Në pritje të zgjidhjes së këtyre pengesave, procesi mbetet ende larg nga realizimi.
Po afrohen afatet e fundit për realizimin e angazhimit
Arritja e afatit ligjor për kalimin nga transmetimet analoge në ato numerike është një sfidë mjaft e vështirë pasi procesi shfaqet tejet i zvarritur dhe hallka te rëndësishme te tij, siç është dhe ndërtimi i rrjeteve numerike të RTSH, nuk kanë filluar ende. Kjo ka dalë si rezultat i zvarritjes së procesit të tenderimit dhe aftësive paguese të RTSH për ndërtimin e rrjeteve numerike, kanë theksuar këto ditë përfaqësues të AMA-s.
Sipas tyre, gjatë muajve të fundit është komunikuar në mënyrë të përsëritur nevoja për koordinim më efikas të punës me RTSH, por nuk ka pasur reagimin e duhur për përmbushjen e këtyre angazhimeve të përbashkëta. AMA është duke shqyrtuar dhe një plan optimizimi të përdorimit të frekuencave hartuar nga operatori kombëtar Digitalb.
Shkrimi u botua në Shqiptarja.com (print) në 25 shkurt 2015
VIDEO KRONIKA
Redaksia Online
(d.a/shqiptarja.com)