Eshtë prezantuar sot në ambientet e Departamenit të Gazetarisë dhe Komunikimit, në Universitetin e Tiranës, botimi shkencor: “Digjitalizimi i transmetimeve televizive tokësore: sfida, paradokse, shpresa”. Të pranishëm në këtë prezantim kanë qenë kontribuesit e këtij vëllimi që është pasardhës i konferencës me po të njëjtin titull që u zhvillua në muajin nëntor të vitit të kaluar.
Në këtë vëllim, Departamenti i Gazetarisë dhe Komunikimit përmblodhi rezultatet e një kërkimi shkencor të zhvilluar përgjatë gjysmës së dytë të vitit 2015, lidhur me tranzicionin në Shqipëri drejt transmetimeve tokësore televizive numerike.
Kryetari i Autoritetit të Mediave Audiovizive, Z. Gentian Sala në fjalën e tij theksoi se bashkëpunimi dhe partneriteti mes institucioneve publike, AMA-s dhe Departamentit të Gazetarisë dhe Komunikimit në UT nuk është spontan, por institucional e afatgjatë. Ky fakt jep garanci se produktet do të shfrytëzohen nga gjeneratat e studentëve dhe kërkuesit e studiuesit e ardhshëm. Bashkëpunimi do të fuqizojë të gjithë aktorët, institucionet publike, median publike, operatorët privatë dhe do të ndërtojë një media të fortë.
Shefi i Departamenit të Gazetarisë dhe Komunikimit Prof. Dr. Artan Fuga tha se botimi ka vlerë për mësimdhënien, kërkimin shkencor, grupet e interesit brenda tregut audioviziv dhe mediatik në përgjithësi.
AMA ka mbështetur këtë studim voluminoz me mbi 600 fletë, i cili ka jo vetëm një fluks pikëpamjesh nga vendas dhe të huaj mbi procesin e digjitalizimit por edhe të dhëna nga tregu audioviziv, sjellja e operatorëve, audiencave etj.
Edhe Zv. Shefi i Departamenit Dr. Mark Marku tha se kjo prurje e re studimore e shpjegon procesin e digjitalizimit jo vetëm si dinamikë mediatike, por si fenomen me impakt të ndjeshëm social. Botimi është është një studim i thelluar, me metodologji të mirëmenduar dhe efektive bashkëpunimi AMA – Departament dhe është model i formatit të bashkëpunimit mes institucioneve publike.
Këtë studim dhe konferencën që parapriu këtë botim e mbështetën edhe shumë agjenci të huaja kërkimore dhe shkencore.
Video News24
Marrë nga Autoriteti i Mediave Audiovizive
