Ka 13 ditë që punonjësit e Digitalb nuk marrin pagat e muajt maj. Kjo është bërë publike prej dy ditësh nga Gazeta TemA. Pagat janë bllokuar nga njëra nga bashkëadministratoret e kompanisë dhe kjo me kërkesë të Aleksandër Frangajt.
Për këtë CNA.al e pyeti zotin Frangaj dhe ai na dha përgjigjen si më poshtë: Duhet të jesh i marrë me patentë që të mos paguash pagat e punonjësve të kompanisë tënde. Dhe kjo në kushtet kur paratë i ke në bankë. Është një marrëzi që jam i sigurtë që askush nga lexuesit tuaj nuk e beson që një pronar apo drejtues i kompanisë i le pa buke, apo në vështirësi financiare punonjësit e vet, për 2 javë rresht.
E para, është absolutisht e pavërtetë që kjo gjë ka ndodhur apo do tu ndodhë prej meje apo personave të lidhur me mua.
Së dyti, pagat e punonjësve të kompanisë Digitalb i ka bllokuar bashkëadministratori i zgjedhur nga aksionerja Vjollca Hoxha me pretekstin se po nuk u bë një pagesë për reklama e Top Channel, nuk bëhet asnjë pagesë nga ana e tij.
Së treti, si presion për reklamat e Top Channel është bllokuar dhe pagesa për ndeshjet e kampionatit spanjoll dhe pagesa e ndeshjeve të kampionatit shqiptar të futbollit. Pasojë e bllokimit të këtyre pagesave ishte dhe mostransmetimi i ndeshjeve të kampionatit spanjoll dhe pritet të mostransmetohen as ndeshjet e kampionatit shqiptar nesër e pasnesër.
Kjo është një marrëzi e paparë që për reklamat e një aksionereje të lihen punonjësit pa paga dhe abonentët pa sinjal të eventeve sportive për të cilat kanë paguar Digitalbin në Shqipëri dhe IPCON në Kosovë.
Të gjithë aksionerët e tjerë janë të shqetësuar nga kjo ngjarje e rëndë që ka lidhje me Top Channel dhe jo me aksionerë të tjerë”.
Teksa u pyet nga CNA.al se përse lexuesit duhet tu besojnë fjalëve të tij, Frangaj paralajmëroi se do publikojë dy emailet që vërtetojnë se kush po i pengon pagat.
“E drejtë. Së pari gjithë stafi e ka të lehtë ta konfirmojë te financa e Digitalb se kush nga administratorët ka bllokuar pagesat.
Së dyti, për tu siguruar ju dhe lexuesit tuaj, që kjo që po ju them është e vërteta, pasi të mbyll telefonatën me ju, do ju dërgoj emailet ku administratorja jonë urdhëron financën të bëhet pagesa e pagave dhe përgjigjen që financa kthen që po pret urdhërin edhe nga administratori i Vjollca Hoxhës. Pastaj le të gjykojë secili kush është bllokuesi”, theksoi themeluesi i Tv Klan.
