Ashtu siç ishte paralajmëruar nga sinoptikanët, Shqipëria është përfshirë mëngjesin e kësaj të diele nga reshje dhe rebeshe të shkurtra shiu.
Sipas Meteoalb, gjatë natës dhe mëngjesit ka pasur reshje të pakta në pjesën më të madhe të vendit, jo më shumë se 7 mm, ndërsa reshje disi më të konsiderueshme, ka pasur në zonën lindore me rreth 20 mm shi.
Pritet që pas orës 13:00 dhe deri rreth orës 19:00 të mbrëmjes, reshjet të intensifikohen në zonat Pukë, Kukës, Dibër, Burrel, Rrëshen, Krujë, Tiranë, Durrës dhe Elbasan, ku priten që intervali 6-7 orësh të sjellë nga 20mm, deri 50 mm shi.
Sasi këto, problematike për kohë kaq të shkurtra, por sipas Meteoalb, mbrëmja sjell fare pak reshje. Temperaturat maksimale janë shënuar rreth orës 11, ku Shkodra shkoi deri në me 30°C, Tirana dhe shume qytete të tjera, kane qëndruar rreth 28°C.
Situata në zonat e prekura
Pak minuta shi mjaftuan në Durrës për të shfaqur problematika në disa rrugë. Ujrat nga kodrat e qytetit krijuan rrëketë e zakonshme që zbresin në rrugën “Aleksandër Goga” dhe me tej.
Shi i shoqëruar me breshër, vetëtima dhe erë të fortë pati dhe në Lushnjë. Reshjet zgjatën për disa minuta, por pa krijuan probleme të mëdha përveç prezencës së ujit në rrugë.
Reshje të dendura shiu u regjistruan edhe në qytetin e Fierit. Kryeqyteti gjithashtu u zgjua nga reshje të dendura shiu që zgjatën për disa minuta. Deri më tani nuk raportohet për probleme.
Vonesa të vogla me mbërritjen e trageteve
Po ashtu, ndryshimi i kushteve atmosferike ka shkaktuar vonesa të vogla në mbërritjen e trageteve nga portet italiane në portin detar të Durrësit.
Paraditen e sotme, në port kanë mbërritur rreth 1 orë më vonë se parashikimi 2 tragetet e linjës Bari-Durrës, ndërsa trageti i Ankonës nuk ka pasur vonesa.
Katër mijë udhëtarë kanë mbërritur me tragete nga Italia në portin detar të Durrësit. Deti regjistron një forcë prej 4-5 ballësh, e cila nuk e ka ndërprerë lundrimin detar.
Kapiteneria e Durrësit bën me dije se forca e detit nuk do të jetë problem për lundrimet në orët në vazhdim, ndërsa reshjet e shiut do të karakterizojnë motin në bregdet edhe gjatë ditës së hënë.
Shqipëria do të mbetet në periferi të stuhisë që ka prekur Europën dhe ka shkaktuar bilance tragjike me Gjermaninë që është epiqendra e saj.
