Fundi i sezonit televiziv është shoqëruar edhe me lajme të ndryshme për lëvizjet e pritshme që mund të vijnë në fillim të vjeshtës në ekranet shqiptare.
Aludimet se edhe Bieta Sulo mund ta lërë Top Channel kanë nisur prej pak javësh të qarkullojnë në portale, por sot vetë autorja dhe moderatorja e njohur ka postuar një status në mbyllje të një sezoni tjetër të suksesshëm të “Ftesë në 5”.
Përmes një postimi në Instagram, Bieta ka falënderur publikun që e ka ndjekur gjatë gjithë sezonit, si edhe stafin e saj.
“Jemi ndalur në më shumë se 200 stacione përgjatë këtij sezoni duke u përshëndetur me mbi 1000 të ftuar, duke bashkëndarë eksperienca, emocione, mendime, plane, dëshira dhe ëndrra. Stacione të tjerë na presin, me më tepër energji dhe përkushtim, pas një vere të bukur… përqafime”,- shkruan Bieta ndër të tjera.
