Sezoni i ri televiziv në RTSH ka nisur fuqishëm, duke u pozicionuar si pararojë me transmetimin ekskluziv të Lojërave Olimpike dhe kampionatit shqiptar të futbollit. Për 17 ditë, nga 26 korriku deri më 11 gusht, shikuesit shqiptarë u mrekulluan me emocionet e sportit, të shoqëruara nga emisioni “Ora Olimpike”. Ndërkohë, më 18 gusht, startoi edhe transmetimi i kampionatit shqiptar të futbollit, ku RTSH ofron çdo javë ndeshje të Abissnet Superiore, Kategorisë së Parë, Kupës së Shqipërisë dhe të Kampionatit të Femrave.
Krahas ndeshjeve të futbollit, dy emisione të reja sportive, “Rubrika Sportive” dhe “Supergol”, kanë filluar transmetimet duke sjellë një format të ri dhe dinamizëm në ekran. “Rubrika Sportive” nën moderimin e Albana Bejkos vjen çdo të diel në RTSH 1, ndërsa “Supergol” transmetohet në RTSH Sport, duke përfshirë analizë dhe komente pas çdo ndeshjeje.
Përveç sportit, RTSH ofron edhe një gamë të gjerë programacioni të pasur për sezonin e ri. Nga 2 shtatori, rikthehet emisioni politik “3D” i Alban Dudushit, një platformë që analizon dhe diskuton çështjet më të rëndësishme të aktualitetit politik, si brenda vendit ashtu edhe ndërkombëtarisht. Po ashtu, në ekranin e RTSH 1 do të rifillojë emisioni i përditshëm “Jetë Shqiptare”, i cili arriti kulmin e popullaritetit sezonin e kaluar nën drejtimin e gazetarëve Andri Xhahu dhe Elona Jaçellari.
RTSH ka përgatitur edhe disa ndryshime të rëndësishme në programacionin informativ. Edicioni i mesditës do të transmetohet tashmë në orën 12:00, duke ofruar lajme të freskëta dhe përditësime të menjëhershme për ngjarjet kryesore të ditës. Ndërsa edicioni i fundit i lajmeve do të transmetohet në orën 23:00, duke mbyllur ditën me përmbledhjen e ngjarjeve më të rëndësishme.
Ky sezon i ri televiziv në RTSH premton të sjellë risi dhe përmbajtje të freskët për çdo grupmoshë, duke u ofruar shikuesve një eksperiencë të pasur dhe argëtuese gjatë gjithë vitit.
