Sezoni i ri televiziv pritet të sjellë një mori programesh të reja dhe të rikthyera në ekranet shqiptare duke filluar nga data 2 Shtator.
Disa prej programeve kryesore që do të fillojnë transmetimin janë:
“Wake Up” në Top Channel – Programi i mëngjesit me Blendi Salajn, Enxhi Nasufin dhe Neada Mucajn do të rikthehet për të nisur ditën me lajme, lojëra dhe muzikë.
“Në Shtëpinë Tonë”, me Alban Musën, Julkën dhe shefen e kuzhinës Linda Fishta në Top Channel, nga e hëna në të premte ira 10:00.
“Ftesë në 5” rikthehet në këtë sezon të ri si përherë nga e hëna në të premte ora 17.00 në drejtimin e Bieta Sulos.
“Fiks Fare” – Emisioni investigativ që zbulon problematika nga të gjitha anët e Shqipërisë, këtë sezon vjen me Julian Deda dhe Xhemi Shehun si moderatorë.
Në Vizion Plus dita nis me “7 pa 5” me Alma Çelajn, Syrjan Rahovën dhe bashkëpunëtoret e tyre. Informacion i ndërthurur me biseda shoqërore në studio, si dhe argëtim i përshtatshëm për mëngjeset e shpejta por edhe ato te gjata deri ne 9:30.
Pasditja në V+ do të vazhdojë me “Vizioni i pasdites”, nga e hëna në të enjte në orën 17.50. Nën drejtimin e moderatores Brikena Prifti në një transmetim live, pasditja e shqiptarëve do të jetë e mbushur me tematika sociale, ngjarje mbi aktualitetin, teksa premton te sjelle histori e personazhe që mbizotërojnë si në botën reale ashtu edhe në atë të rrjeteve sociale, histori njerëzore, reportazhe në terren etj.
Një tjetër emision që do të fillojë transmetimin më 2 Shtator, është edhe sezoni i ri i programit satirik “Fake Off” në Vizion Plus. Ky format, nën moderimin e ikonave të humorit shqiptar, Agron Llakaj dhe Xhevahir Zeneli, do të vazhdojë të trajtojë me ironi dhe humor lajmet e ditës, duke parodizuar politikën, aferat korruptive dhe fenomene të tjera negative në shoqëri.
Duke filluar nga nesër, datë dy shtator, rikthehen në ekran e RTSH 1 emisioni politik “3D” i gazetarit Alban Dudushi, i njohur për analizën e thellë të temave mbi aktualitetin politik në vend, rajon dhe botë, peshën e debatit si dhe rëndësinë e të ftuarve, në orën 21:00 të mbrëmjes.
Nga kjo e hënë, datë 2 shtator nis rrugëtimin e përditshëm në ekranin e kanalit RTSH 1 edhe emisioni më I ndjekur “Jetë shqiptare” i cili shënoi sezonin e shkuar rekorde audience nën drejtimin e gazetarëve Andri Xhahu dhe Elona Jaçellari.
Por në RTSH do të ketë edhe ndryshim në oraret e edicioneve informative. Edicioni Informativ i mesditës do të spostohet një orë më herët dhe do të vijë në ekranin e RTSH 1 në orën 12:00, me lajme krejtësisht të reja dhe të minutës së fundit si dhe me lidhje të drejtpërdrejta për ngjarje të rëndësishme, me gazetarët e aktualitetit në terren.
Ndërsa edicioni i fundit i lajmeve të ditës në këtë kanal do të transmetohet në orën 23:00 të mbrëmjes.
Në ekranin e Televizionit Klan dita do të nis me “Aldo Morning Show”, si gjithnjë nën moderimin e Aldon Lipes. Orari mbetet gjithnjë i njëjti: 7 pa 1 minutë.
“Shije shtëpie”, Nga e hëna në të shtunë, live, nga ora 09:05-11:00, me Katerina Trungun & Znj.Vjollca. Një emision edukues, informues, argëtues.
Në mbrëmje në Tv Klan vjen emisioni satiro-investigativ “Stop” nga Saimir Kodra & Gentian Zenelaj.
Këto janë vetëm disa nga programet që do të rinisin transmetimin në 2 Shtator, duke sjellë një sezon të ri plot surpriza dhe argëtim për publikun shqiptar.
