Mediat e asaj kohe shkruan se gazetari ishte shtyrë për të dhënë dorëheqjen pas një përplasjeje me drejtorin e programit, Filip Çakulin, ndërsa të tjerë thanë se ishte tunduar nga oferta e Agon-it për të prezantuar një format të ngjashëm, kundrejt një pagese prej 12 mijë euro në muaj. Sidoqoftë Saimiri katër vite pas atij vendimi, nuk është penduar aspak për zgjedhjen e bërë.
I ftuar në emisionin “Tek Unë” me Arjola Shehun, gazetari ka treguar se vendimi i tij kishte ardhur shumë natyrshëm dhe falë punës së madhe dhe besimit tek vetja, sot është shumë i kënaqur me punën krah Gentian Zenelajt në emisionin investigativ “Stop” në TV Klan.
“Fakti që ika nuk ishte i vështirë. Njeriu ka një kurbë të tijën, si profesionale, jete dhe krijimtarie,” ka treguar Kodra.
“Është pjesë shumë e rëndësishme e gjithë punës time televizioni. Mora një vendim dhe u largova. Ishte e vështirë…Jam nga të vetmit që nuk më kanë hequr nga puna, unë jam larguar nga Top Channel. Shumë njerëz e mendonin si fundin e botës, por sot tregoj që nuk është ashtu. Njeriu që ka nismë, besim tek vetja, që punon fort, ia del. Qoftë nga Top-i po të iki, qoftë nga BBC-ja. Sepse janë njerëzit që bëjnë televizionet dhe jo anasjelltas. Vendimi që nuk do pendohem asnjëherë, është largimi nga Top Channel.”
