Udhëheqësit e BE arritën një marrëveshje prej 1,82 trilionë eurosh të martën në mëngjes, para këto që do të përdoren për daljen nga kriza e koronavirusit.
Marrëveshja vjen pas ditësh diskutimesh të gjata, përplasjesh e debatesh të mëdha, mbi buxhetin shtatë vjeçar dhe paketën e rimëkëmbjes, e cila përfshin huazimin e përbashkët të një fondi të rimëkëmbjes prej 750 miliardë eurosh që do të ndahet si grante dhe kredi.
Duke folur para gazetarëve, Presidenti i Këshillit Evropian Charles Michel e quajti atë një “marrëveshje të mirë”, duke deklaruar se “Evropa është e fortë”.
Presidenti i Komisionit Evropian, Ursula von der Leyen, ndërkohë, nënvizoi lëshime të rëndësishme të bëra në kërkimin e një kompromisi, duke thënë se ajo ndjen keqardhje për shkurtimet në “politikat moderne” në kërkime dhe inovacion.
Presidenti francez Emmanuel Macron e quajti atë një “ditë historike për Evropën”.
Plani i rimëkëmbjes përfshin grante në vlerë prej 390 miliardë euro dhe kredi në vlerë prej 360 miliardë euro për shkak të një kompromisi me të ashtuquajturat katër vendet, tani pesë, Hollanda, Austria, Finlanda, Suedia dhe Danimarka.
Fondi i rimëkëmbjes fillimisht ishte caktuar 500 miliardë euro për t’u shpërndarë si grante dhe 250 miliardë euro kredi, i cili u mbështet dhe shtyrë nga një aleancë e ngushtë franko-gjermane.
Të hënën, Merkel kishte riafirmuar mbështetjen e saj për “pjesë të konsiderueshme të granteve” që do t’u jepeshin vendeve më të goditura nga ndikimi ekonomik i pandemisë COVID-19.
“Kjo është përgjigjja që na nevojitet për një situatë të jashtëzakonshme,” tha ajo, duke shtuar: “situatat e jashtëzakonshme kërkojnë gjithashtu përpjekje të jashtëzakonshme”.
Të martën herët, Kryeministri Austriak Sebastian Kurz ndau një foto të “frugals”, duke deklaruar se paketa përfundimtare ishte një “rezultat i mirë për BE”.
Tani marrëveshja do të duhet të kalojë shqyrtimin e parlamentit Evropian, i cili së shpejti do të thërrasë një seancë plenare të veçantë.
Bërja e historisë
Ajo që ishte planifikuar si një samit dy-ditor është bërë një nga më të gjatë në historinë e BE-së.
Bisedimet fillimisht ishin planifikuar të përfundonin të Shtunën, por përpjekja për të ndërmjetësuar një kompromis i shtyu udhëheqësit të zgjasin qëndrimet e tyre në hotele.
Është krahasuar me samitin e Nice në 2000, ku argumentet mbi ndryshimet e traktatit dhe zgjerimin u shtrinë në katër ditë.
Shërbimi i shtypit i Këshillit Evropian ka thënë se samiti i vitit 2000 në Nice “filloi në orën 09:00 të mëngjesit në 7/12 për ‘Konferencën Evropiane” (# EU15 plus kandidatët për pranim + të tjerët) dhe zgjati deri në 05 e 30 të mëngjesit të hënën 11/12.
