Mediat italiane kanë shkruar për Ronela Hajatin, e cila ka mbërritur prej pak ditësh në Torino ku do të mbahet dhe Eurovision 2022. Ronela ka qenë e para që ka mbërritur në Torino, e cila do të hapë gjysmëfinalen e parë me 10 Maj ndërsa shpreson që të arrijë në mbrëmjen e 14 majit.
“Mamaja ime mori biletë vetëm për finalen, nuk rri dot kaq shumë ditë”, është shprehur këngëtarja. E pyetur për pjesëmarrësit e tjerë në festival, ajo tha: “Nuk e di kush do të fitojë. Nuk bëj dot asnjë parashikim, ka shumë këngë të bukura nga shumë artistë të këndshëm”, rrëfen Ronela.
“Shumë prej tyre i kam takuar në shkurt në disa festa që janë organizuar. Ne jemi të njohur.”, shton ajo. Ndërsa Niko Komani, i cili ka punuar për veshjet e Ronelës thekson për median italiane: “Shumë seksi, siç mund të ishte Christina Aguilera për çmimet MTV…”
ronela hajati
Ronela është shprehur se Eurovision është një ëndërr që po e sheh të bëhet realitet. Tani që është këtu, prioriteti i Ronelës është të bëjë performancën më të mirë. Por ajo po synon gjithashtu të shfaqë një anë disi të ndryshme të Shqipërisë së saj nga ajo që është parë në skenën e Eurovizionit gjatë këtyre viteve të fundit.
“Së pari, ajo që është e ndryshme është se unë nuk po sjell një baladë, të cilën Shqipëria e sillte në garë prej shumë vitesh. Ishin balada të bukura, nga këngëtarë me zë të bukur. Por mendoj se po sjell një stil më modern. Ideja ishte e imja. Doja të kisha një këngë moderne.
Doja të mbaja disa pjesë që do të ndihmonin në identifikimin e Shqipërisë. Dhe duke qenë se të gjithë kemi sekrete, të gjithë mund ta gjejmë veten në këngë. Inskenimi – ishte kryesisht ideja ime. Mesazhi është se të gjithë mund të duan kë të duan. Dhe nëse duan ta mbajnë sekret – kjo është jeta e tyre.”, tha Ronela.
Kujtojmë që ditën e djeshme, organizatorët e Eurovision fshinë foton e Ronelës nga Instagrami, pasi kërcimi është cilësuar si shumë provokues. Thuhet se këngëtares i është kërkuar që të ndryshojë koreografinë megjithëse ende nuk ka një konfimim zyrtar.
