‘Klanifornia’ është emri i spektaklit më të ri të humorit, i cili vjen në televizionin Klan nga skenaristi Turjan Hyska.
Në formatin e ri të modifikuar të ‘Apartamentit 2xl’, duket se shumë gjëra kanë ndryshuar, pasi spektakli do të jetë më i ngjashëm me spektaklin e humorit në Top Channel ‘ Portokalli’.
Moderatore e këtij spektakli do të jetë Marina Vjollca, ndërkohë që kasta e aktorëve përbëhet nga Julian Deda, Eliona Pitarka, Albano Bogdo, Visian Ukcenaj, Delinda Disha, Esmeralda Metka dhe Olsi Bylyku.
Spektakli më i ri i humorit, nuk duket se është pritur mirë nga Salsano Rrapi, i cili i ftuar disa ditë më parë në emisionin ‘Rreze Dielli’, komentoi largimin e disa prej aktorëve të ‘Portokallisë’.
Salsano foli gjithashtu për raportin e tij me kolegun Julian Deda, ai tregoi se Juliani është kolegu i vetëm i tij me të cilin ai nuk flet, dhe nuk ka më asnjë lloj raporti.
Salsano u shpreh se mes tyre nuk ka ndodhur asnjë konflikt, por rrethanat erdhën të tilla që mos të flisnin më, ai shtoi se- “aktrimi është njësoj si futbolli, nëse dikush të paguan më shumë, do ikësh nga ekipi yt dhe do luash për një ekip tjetër.”