Një mori produksionesh në transmetim dhe të tjerë formate priten të fillojnë këto muaj në ekranin e Top Channel. Pas Top Fest, Portokalli, Big Brother Albania 8 një tjetër format me patente ndërkombëtare do të nise së shpejti transmetimin për herë të parë në Shqipëri.
Bëhet fjalë për Your Face Sounds Familiar, një format kompeticioni muzikor i zhanrit talent, ku protagonistë janë disa nga figurat më të rëndësishme të botës së artit, televizionit, kinemasë etj, të transformuar në paraqitje në ikonat e muzikës ndërkombëtare, që do të performojnë live këngët e tyre. Ky format është prezent në më shumë se 20 shtete dhe ka arritur shifra audience maksimale. Formati mban firmën e Endemol dhe është transmetuar për herë të parë në Spanjë në vitin 2011.
Prezantues të versionit shqiptar do të jenë Eno Popi dhe Xhemi Shehu ndërsa autor Rezart Aga. Ende nuk dihet data e saktë se kur do të nis transmetimi por sipas burimeve tona ka gjasa që çdo gjë të jetë gati në muaji prill.
