Në mes të debateve të shumta lidhur me vaksinimin me AstraZeneca, Komuniteti Kombëtar i Imunizimit dhe Vaksinimit është mbledhur këtë mbrëmje për të diskutuar mbi procesin në vendin tonë. Sipas “BalkanWeb” Komiteti ka vendosur që vaksinimi të vazhdojë.Ditën e shtunën në Tiranë nisi vaksinimi i 250 mësuesve dhe pedagogëve në shkollën “4 Dëshmorët”, teksa ditën e sotme rreth 50% e mësuesve në Elbasan refuzuan të vaksinohen.
Më herët ditën e sotme, kryeministri Edi Rama ka dhënë siguri të plotë se nuk ka asnjë problem nga vaksina. Rama ka thënë se deri më tani nuk kanë marrë asnjë rekomandim nga OBSH për ta pezulluar vaksinimin, sakaq ka shtuar se nuk ka asgjë për t’u shqetësuar, pasi sipas tij, në Britani, miliona njerëz po vaksinohen.
Debati mbi AstraZeneca
Disa vende si : Italia, Bullgaria, Rumania, Danimarka, Norvegjia, Tajlanda kanë pezulluar përkohësisht përdorimin e grupit të vaksinave AstraZeneca për shkak të shqetësimeve për efektet e saj anësore, pas raportimeve të izoluara të pacientëve që janë përballur me trashje gjaku. Nga ana tjetër, vende si: Australia, Meksika, Filipinet, Kanadaja kanë thënë se nuk ka të dhëna se vaksina shkakton reaksione agresive.
Vetë kompania AstraZeneca ka thënë se nuk ka gjetur të dhëna për rritje të ndërlikimeve pulmonare apo të trombozave në vena – bazuar në të dhënat që nga vaksinimi deri më tani. Kurse Organizata Botërore e Shëndetësisë ka thënë më 12 mars se është duke analizuar raportimet për probleme me koagulim të gjakut te disa persona në Bashkimin Evropian, të cilët janë vaksinuar me një dërgesë të vaksinave të AstraZenecas. Megjithatë, një zëdhënëse e organizatës ka deklaruar se nuk ka arsye për shqetësim. Sipas saj nuk është vërtetuar ndonjë lidhje shkak-pasojë mes vaksinës dhe problemeve të vërejtura.
