Versioni italian i kanalit shqiptar Agon Channel Italia vazhdon të jetë në transmetim në kanalin 33 të dixhitalit tokësor italian.
I kontaktuar nga tv blog Giancarlo Padovan, drejtori i lajmeve i kanalit italian ka konfirmuar se: “Kanali ynë nuk është mbyllur… është ndërprerë energjia elektrike e kanalit shqiptar. Jemi në pritje të dizpozitave, por na është kërkuar që të qëndrojmë në Tiranë. Siç dihet një pjesë e redaksisë ndodhet këtu, dhe një pjesë në Romë. Nuk kam asgje tjeter për të thënë. Do të flasë dhe vendosë vetë presidenti. Nuk ka asnjë sekuestro, por një ndërprerje të elektricitetit. Ne po transmetojmë nga Roma. Për momentin pa edicion informativ, por presim dispozita”.
Kanali Agon Channel Italia ka kohë që nuk transmeton më programe të reja dhe programacioni i tij vazhdon të jetë i mbushur me ritransmetime që nga vera e këtij viti. Te vetmet programe që kanë vazhduar rrjedhën normale janë edicionet e lajmeve dhe emisioni sportiv i Padovan. Shumë prej figurave të njohura italiane që u bënë pjesë e kanalit kanë muaj që kanë përfunduar kontratën, i vetmi që vazhdon ende të ketë besim është pikërisht Giancarlo Padovan.
