Autoriteti i Medias Audiovizive (AMA) ka njoftuar një hap të rëndësishëm drejt rritjes së sigurisë dhe etikës në mjedisin digjital shqiptar. Në një deklaratë zyrtare, AMA ka bërë me dije se ka vendosur një marrëveshje bashkëpunimi me platformën X (ish-Twitter), me qëllim monitorimin dhe adresimin me prioritet të përmbajtjeve potencialisht të dëmshme në gjuhën shqipe, që shpërndahen në këtë rrjet social.
Qëllimi kryesor i kësaj marrëveshjeje është krijimi i një hapësire digjitale më të sigurt dhe më të shëndetshme për të gjithë përdoruesit, ku nuk tolerohet gjuha e urrejtjes, dhuna, dezinformimi apo përmbajtja që dëmton fëmijët dhe komunitetet vulnerabël.
AM
A thekson se ky bashkëpunim përfaqëson një rekord të ri në ndërveprimet institucionale me platformat globale, duke siguruar që për herë të parë gjuha shqipe të jetë pjesë e një protokolli aktiv monitorimi në X.
“Një mjedis digjital i pastër, pa dhunë, pa urrejtje, me mbrojtje të të drejtave të fëmijëve dhe grupeve të cenueshme është prioritet për AMA,” thuhet në njoftimin zyrtar të Armela Krasniqit, Drejtueses së AMA.
Kjo nismë e re pritet të përforcojë angazhimin institucional për etikën mediatike dhe të sjellë rezultate konkrete në raportimin, verifikimin dhe ndalimin e përmbajtjeve të papërshtatshme në gjuhën shqipe.
