Radio Televizioni Shqiptar (RTSH), institucioni i vetëm mediatik publik në vend, ndodhet sot përballë një krize të thellë financiare. Në një shkresë zyrtare drejtuar Ministrit të Financave, Petrit Malaj, drejtoresha e përgjithshme e RTSH-së, Eni Vasili, ka kërkuar një mbështetje shtesë prej 200 milionë lekësh nga buxheti i shtetit, duke evidentuar paaftësinë e institucionit për të përmbushur detyrimet aktuale financiare.
Në dokumentin zyrtar, Vasili ngre shqetësimin për një sërë problematikash strukturore që e kanë çuar RTSH-në në këtë gjendje:
Tarifa e ulët për pajisjen televizive, e cila nuk reflekton kostot reale të funksionimit;
Mungesë financimi të plotë për prodhimet e financuara nga vetë RTSH;
Detyrime të akumuluara ndër vite, veçanërisht për të drejtat televizive dhe sportive;
Vendime gjyqësore të humbura për shkak të largimeve të padrejta apo aksidenteve në punë gjatë periudhës 2021–2024, që kanë kushtuar mbi 326 milionë lekë.
Në këtë kontekst, Vasili kërkon që fondet shtesë të shkojnë në drejtim të prodhimeve filmike dhe artistike me rëndësi kombëtare dhe ndërkombëtare, mbështetjen e Orkestrës Simfonike dhe sektorit të kinematografisë, si dhe për projekte teknike që lidhen me dixhitalizimin dhe teknologjitë e reja.
Megjithatë, në një qasje të ndryshme nga drejtuesit e mëparshëm, drejtoresha e RTSH-së kërkon zyrtarisht auditim ndër vite të strukturave dhe fondeve të përdorura, për të hedhur dritë mbi mënyrën se si është administruar buxheti publik në institucion.
Historia e keqmenaxhimit dhe ndikimeve politike
Pavarësisht përpjekjeve të herëpashershme për reformim, RTSH nuk ka arritur kurrë të konsolidohet si një radiotelevizion publik i pavarur, në shërbim të qytetarëve. Përjashtim bën periudha kur në krye të institucionit ishte Thoma Gëllçi, i cili tentoi të modernizonte dhe profesionalizonte RTSH-në, por u pengua nga konkurrenca dhe përfundoi edhe në burg për çështje që ende mbeten të debatueshme.
Prej dekadash, RTSH ka funksionuar më shumë si një institucion klientelist, ku emërimet në poste kyçe janë bërë mbi baza politike apo në funksion të interesave të televizioneve private konkurruese. Në disa raste, është aluduar se drejtuesit janë favorizuar nga media private, duke përdorur institucionin për interesa të jashtme.
Një moment kritik për transparencë dhe reformë
Me mbi 1000 punonjës të paguar nga taksat e qytetarëve, RTSH përfaqëson një peshë të rëndësishme në buxhetin publik. Nëse nuk ndërhyhet në mënyrë strategjike dhe transparente, rrezikohet jo vetëm vijueshmëria e shërbimit mediatik publik, por edhe integriteti institucional i një prej aktorëve kyç në formësimin e diskursit publik.
Auditimi i kërkuar nga Eni Vasili mund të jetë një hap vendimtar drejt rikthimit të besimit publik dhe vendosjes së një kulture të re llogaridhënieje dhe profesionalizmi në RTSH.
Burimi: kohajone.com
