Një tjetër projekt i veçantë muzikor vjen nga Marsela Çibukaj, një nga zërat më të fuqishëm dhe të vlerësuar të muzikës shqiptare. Kënga më e re e saj, “Tym Duhani dhe Raki”, u publikua sot në të gjitha platformat digjitale, duke sjellë një baladë të sinqertë që prek ndjenjat më intime të dëgjuesit.
Ky krijim artistik bashkon emra të rëndësishëm të muzikës shqiptare: teksti i këngës është shkruar nga Anxhela Peristeri, një artiste me kontribut të gjatë në skenën muzikore, muzika është kompozuar nga Irkenc Hyka, i njohur për aftësinë e tij për të krijuar melodi që mbeten gjatë në kujtesë, ndërsa videoklipi është realizuar nga regjisori Armando Delia, i cili sjell një dimension vizual emocionalisht të ngarkuar dhe kinematografik.
Kënga “Tym Duhani dhe Raki” përshkruan, përmes metaforës së pirjes së rakisë dhe tymit të duhanit, një ndjesi të thellë vetmie, mallëngjimi dhe reflektimi mbi një dashuri të humbur apo një përvojë të rëndë shpirtërore. Ky simbolizëm i përdorur në tekst dhe muzikë është i përforcuar më tej nga interpretimi përmes vokalit tëi Marselës, që arrin të komunikojë dhe të përçojë emocion pa ndonjë artific.
Videoklipi, i realizuar nga Armando Delia, është xhiruar në Napoli, ku përmes kinemasë dhe simbolikave vizuale, ndjek gjurmët e një shpirti të trazuar nga kujtimet, mungesat dhe dashuritë e kaluara. Pamjet janë të ndërthurur me një atmosferë filmike nostalgjike që shkon përkrah linjës emocionale të këngës.
Vetë videoklipi është ndërtuar mbi një atmosferë intime, melankolike, ku regjisori ndërthur dritëhijet dhe detajet vizuale për të përforcuar narrativën e brendshme të këngës.
Ky projekt i ri tregon një tjetër fazë të pjekurisë artistike të Marselës, e cila është përherë në kërkim të autenticitetit dhe ndjenjës në muzikën që bën. “Tym Duhani dhe Raki” nuk është thjesht një këngë, por një rrëfim i ndjerë që fton dëgjuesin të ndalet, të dëgjojë dhe të ndiejë.
Me këtë projekt, Marsela rikthehet jo vetëm artistikisht, por edhe vizualisht. Ajo shfaqet në klip me stilin e saj karakteristik, që e identifikoi në fillimet e karrierës: një kombinim i elegancës vintage dhe ekspresionit të lirë artistik. Ky rikthim në rrënjët personale, si në zë, si në stil, përforcon më tej autenticitetin e saj.
Kënga është tashmë disponibël në YouTube dhe në të gjitha platformat streaming si Spotify, Apple Music, Deezer dhe të tjera.
