Në episodin më të fundit të James Corden në “Carpool Karaoke” këtë të Premte, drejtuesi i Late Late Show mikpriti këngëtarin Michael Buble. Siç është bërë traditë ata së bashku kënduan edhe disa nga këngët më të dëgjuara si “Haven’t Met You Yet” dhe “It’s A Beautiful Day” por gjithçka u bë tepër emocionuese teksa ata filluan të flisnin edhe për djalin e Buble dhe diagnozën e tij me kancer.
“Është shumë e vështirë ta përballosh sepse është tepër e dhimbshme të flasësh,” tha ai.
Teksa përpiqej të mbante lotët, ai foli edhe për transferimin e të gjithë familjes së tij në Kaliforni me qëllim trajtimin më të mirë për Noahn.
“Kur e gjitha filloi, u bëra i fortë në një farë mënyre,” u shpreh Buble për Corden. “Kur kanceri u mposht pas kemioterapisë dhe doktorët thanë “Ne arritëm, është mirë, është shumë mirë,” rashë, thjesht rashë. Gruaja më ngriti tani.”
Buble bëri dhe një thirrje gjithashtu tek shikuesit për të kontribuar në lëvizjen “Stand Up to Cancer”.
