Në një kohë kur shifrat e të infektuarve nga Covid-19 po kapin vlera alarmante, pyetja që i mundon të gjitha është nëse shkollat do të vazhdojnë të qëndrojnë të hapur apo jo.
Në një konferencë për shtyp, kryeministri Rama ka folur për gjendjen aktuale të pandemisë në vendin tonë, ku ka prekur edhe çështjen e shkollave.
“Sot do të fokusohemi tek arsimi, me fokus të posaçëm tek procesi i rindërtimit por jo vetëm”, – është shprehur Rama. “Duke e shkurtuar ndjeshëm këtë herë dhe për shkak të formatit hyrjen time, dua të nënvizoj faktin që është me një rëndësi të posaçme dhe do të kërkoja dhe ndihmën e të gjithëve ju që më ndiqni që të jemi sa më të vetëdijshëm që kemi në dorë, secili në pozicionin e vet por patjetër së bashku si komunitet, si bashkësi që jetojmë në këtë vend, të shmangim qoftë kalimin e spitaleve në një mbingarkesë që do ta bënte praktikisht tejet të vështirë trajtimin normal në vazhdimësi të atyre që janë në nevojë dhe qoftë mbylljen e përgjithshme!”
Sakaq, kreu i ekzekutivit shton: “Dua të theksoj dhe njëherë se çfarë hapet dhe çfarë mbyllet është përgjegjësi e autoriteteve tona të autorizuara që kanë të gjithë ekspertizën dhe autoritetin ligjor që të marrin vendime në këto kohë të vështira. Sipas të gjitha të dhënave dhe ndjekur të gjitha orientimet e autoriteteve shkencore, shëndetësore në të gjithë vendet që ne i ndjekim me shumë vëmendje për të mësuar sa më shumë shkollat nuk konsiderohen një vatër e nxehtë por një hapësirë që si të gjitha hapësirat e tjera kanë patjetër dhe potencialin e tyre të rrezikut!”
“Nga njëra anë është shumë e rëndësishme që masat të zbatohen nga çdo shkollë, siç po ndodh, që personeli drejtues dhe pedagogjik të jetë sa më i durueshëm dhe këmbëngulës në zbatimin e tyre dhe nga ana tjetër ajo çka kam dëgjuar nga ekspertët tanë është që në vlerësimet e përgjithshme që bëhen lidhur me shkollat, domosdoshmëria për të mbajtur një ekuilibër midis këtij aspekti, mbrojtjes së drejtpërdrejt dhe mbrojtjes psikologjike të fëmijëve është në rendin e ditës të kësaj vendimmarrjeje. Është një vendimmarrje në dorë të autoriteteve tona, nuk më takon mua, nuk na takon neve”, – ka përfunduar Rama fjalën për çështjen e shkollave.
