Ditën e sotme Top Channel në studion e Top Show do të zhvillojë një debat të shumëpritur mes Kryeministrit dhe disa nga studentët që protesojnë.
Edhe pse vazhdimisht është bërë thirrje në vendin e organizimit të protestës për të mos përfshirë politikën në këtë kauzë, mesa duket dashur ose pa dashur ajo po përfshihet në brendësi
Top Channel ka publikuar në faqen zyrtare në web një artikull në të cilin “demaskon” tentativën e Forumit Rinor të Partisë Demokratike për anullimin e debatit televiziv. Përmes një “screenshot-i” në WhatsApp të një grupi të anëtarëve të forumit rinor, i publikuar nga Gazeta Tema, Grida Duma shihet se përpiqet të nxisë protestuesit për të bllokuar rrugën e Zogut të Zi për të ndaluar kalimin e studentëve në Kashar, ku gjenden edhe studiot e Top Channel.
Ndërkohë, rreth orës 19:00, Top Channel ka rifreskuar lajmin duke ndryshuar titullin në bazë të një deklarate të Partisë Demokratike.
Sipas PD, “Mediave u është shpërndarë nga qeveria një fotomontazh me emrat e disa drejtuesve të PD. Fotomontazhi ka për qëllim të tregojë se në PD është ngritur një grup që koordinon protestën e studentëve. Kjo është një sajesë e propagandës banale të Edi Ramës, i kapur nga paniku për shkak të protestave në të gjithë Shqipërinë. Jemi në dijeni se po ju bëhet presion për ta publikuar, por është në nderin tuaj, të mos bini pre e mashtrimit të trashë qeveritar. Ju keni çdo mundësi të bëni verifikimin tuaj të pavarur për të provuar se ky është fake news”.
Protesta e studentëve po shihet me një vëmëndje të jashtëzakonshme jo vetëm nga mediat e vendit por edhe nga ato ndërkombëtare, ndërkohë që askush nuk e di vijueshmërinë e saj sepse nga momenti në moment priten deklarata edhe nga Kryeministria dhe Ministria e Arsimit./IMA/
