Kryeministri Edi Rama zhvilloi një bashkëbisedim online me Këshillin Koordinues të Diasporës ku u diskutua për votën e emigrantëve në zgjedhjet e ardhshme parlamentare të vitit 2021.
Duke u ndalur te reforma zgjedhore, Rama tha se brenda kësaj jave do të mbyllen të gjitha detajet për marrëveshjen e arritur në Këshillin Politik dhe me dakordësi apo jo ato do i dorëzohen komisionit të reformës zgjedhore para 30 qershorit, ku përfundon dhe afati i punës së saj.
Edi Rama: ”Brenda javës përfundon procesi i diskutimeve në të ashtuquajturën Këshill Politik mes mazhorancës dhe opozitës jashtëparlamentare, dhe në të gjitha rastet, me dakordësi, pa dakordësi nga ana e tyre, detajet do t’i dorëzohen Komisionit të Reformës Zgjedhore deri në datën 30 qershor, kur mbaron dhe afati i punës.”
Pas arritjes së dakordësisë për reformën zgjedhore më 5 qershor, riformatimi i Komisionit Qëndror të Zgjedhjeve ka mbetur një çështje e pazgjidhur, ku palët nuk kanë arritur të gjejnë gjuhën e përbashkët për përzgjedhjen e anëtarëve të dy komisioneve të reja të këtij organi.
