Ka dhënë dorëheqjen nga detyra dhe është larguar nga radhët e policisë, zëvendësdrejtori për hetimin e Krimit në Drejtorinë e Policisë së Tiranës, Arsen Sinomati.
Sipas arsyetimit të dhënë prej tij, dorëheqja ka ardhur për arsye personale.
Ditën e djeshme drejtori i Përgjithshëm i Policisë së Shtetit Ardi Veliu zhvilloi një takim me drejtuesit e Policisë së Tiranës dhe të Elbasanit, pas ngjarjeve të fundit kriminale, ku në kryeqytet ju vu tritol automjetit të shtetasit Preg Gjini, dhe në Elbasan u ekzekutua Bujar Çela, vëllai i Talo Çelës, i akuzuar si grabitësi i një shume të madhe parash në Rinas.
Ardi Veliu kërkoi një angazhim maksimal te policisë dhe u la detyra konkrete dhe afate për zbardhjen e ngjarjeve.