Skenë horror në familjen e dy motrave që u vranë nga Përparim Ademi. Zbardhet dinamika. Autori përdori fëmijën e Zhaneta Metanit për të hyrë në apartament. Dy viktimat ishin duke ngrënë bukë dhe tentuan t’i mbyllnin derën. Ademi zbrazi automatikun kinez dhe u largua pas vrasjes.
Zbardhet dinamika e vrasjes së dyfishtë që tronditi vendin në Vigjilje të natës së ndërrimit të viteve. Dy motrat, Kristina Bardhi dhe Zhaneta Metani u ekzekutuan me kallashnikov nga Përparim Ademi, 59 vjeç, shqiptar i Maqedonisë së Veriut me vendbanim në Tiranë. Burime për Dosja.al bëjnë me dije se autori i vrasjes përdori fëmijët për t’u ngjitur në apartamentin pranë rrugës “Bajram Tusha” në zonën e Astirit.
Para se të ngjitej në pallat, ai mori përdore një nga fëmijët e Zhanetës dhe u ngjit në hyrjen ku banonte ajo me të miturit dhe të motrën. Kur Ademi u ngjit, dy viktimat, Kristina dhe Zhaneta kanë qenë duke ngrënë bukë. Sapo dera është hapur dhe të dy motrat panë Përparimin të hynte, kanë tentuar t’i mbyllin derën.
Por në këtë moment, autori ka qelluar me kallashnikovin që mbante me veten, në fillim në drejtim të derës, dhe më pas drejt dy grave, që kanë qenë në tokë, duke u përpjekur të shpëtonin. 5 nga 26 gëzhojat e plumbave bëjnë me dije burimet, kanë prekur trupat e dy grave, ndërsa të tjera, janë hedhur nga Ademi nëpër muret e banesës. Automatiku i përdorur në këtë ngjarje, model kinez, me karikatorin të zbrazur u gjet në banesën e viktimave.
Vrasja ndodhi më 31 dhjetor, në rrugën Bajram Tusha në Astir. 59-vjeçari Përparim Ademi i qëlloi për vdekje me kallashnikov të dy motrat, Kristinën dhe Zhanetën, ndërsa e gjithë ngjarja ndodhi në sy të dy fëmijëve të mitur të kësaj të fundit. Policia i gjeti të dy motrat në banesë pa shenja jete, ndërsa në vendngjarje u gjetën 26 gëzhoja kallashnikovi. Pas vrasjes, Ademi u largua me këmbë nga vendngjarja, ndërsa u arrestua 2 orë pas krimit. Ai pretendoi se do të vetëdorëzohej vetë në Polici, dhe shprehu pendesë për vrasjen e dyfishtë.