Pas suksesit të bujshëm të edicionit të parë, “Ferma VIP” rikthehet me sezonin e dytë në ekranin e Vizion Plus, duke nisur më 31 Mars, me premtimin për të qenë më i madh, më emocionues dhe më surprizues se kurrë më parë.
Çdo të hënë dhe të premte në orën 21:00, publiku do të ketë mundësinë të ndjekë Prime Show në Vizion Plus, ndërsa ndjekësit më të apasionuar do të mund të përfshihen 24/7 në dinamikën e fermës përmes dy kanaleve të dedikuara në Tring: “Ferma VIP 1” dhe “Ferma VIP 2”.
Në krye të spektaklit rikthehet Luana Vjollca, e cila do të drejtojë këtë reality show me stilin e saj të njohur, duke garantuar për një përvojë argëtuese, të gjallë dhe gjithmonë surprizuese.
Pjesëmarrësit? Ende nuk janë zbuluar plotësisht, por organizatorët premtojnë një kast me emra bombastikë, nga personazhe të njohur të ekranit, artit, sportit dhe më shumë – një përzierje karakteresh që premton dinamika të forta, batuta, emocione dhe histori njerëzore që do të ngjallin interes javë pas jave.
Nga 31 Marsi, të gjithë të gozhduar para ekranit – “Ferma VIP 2” po vjen fuqishëm!
