Hidhet gaz lotsjellës në koncertin e Goran Bregoviç në Korçë. Ishin disa të rinj të cilët gjatë performancës së këngëtarit serbo-boshnjak në qytetin juglindor për Festën e Birrës hodhën në turmë gazin, duke shkaktuar probleme me sytë dhe me frymëmarrjen për pjesëmarrësit në koncert.
Për ngjarjen policia ka shoqëruar 8 të rinj, ndërsa disa prej qytetarëve që u prekën nga gazi lotsjellës shprehën indinjatën ndaj policisë për masat e marra për koncertin.
Kujtojmë se ardhja e Bregoviç në Korçë u parapri nga debate të shumta, jo vetëm mes qytetarëve në rrjetet sociale, por edhe artistëve, të cilët anuluan praninë e tyre në këtë festë.
Ata kundërshtonin ardhjen e Bregoviç për shkak të qëndrimit të tij për masakrën në Kosovë, duke e akuzuar se ka frymëzuar paramilitarë serbë për masakrat që ndodhën.
Forcat e policisë, sidomos mbrëmjen e sotme kanë qenë më të shtuara për shkak të kundërshtimit që ka pasur për performancën e artistit serb dhe për këtë arsye kanë ndërhyrë menjëherë për të ndaluar personin që hodhi gazin lotsjellës.
Goran Bregoviç lindi në Sarajevë në vitin 1950. Babai i tij ishte kroat dhe nëna serbe, ndërsa bashkëshortja e tij është boshnjake. Ai është një muzikant dhe ish-frontman i grupit “Bijelo Dugme”, një nga grupet më të njohura të rokut në ish-Jugosllavi. Bregoviç vetë nuk është shprehur publikisht mbi luftërat në ish-Jugosllavi. “Qëndrimi neutral” thonë se ishte arsyeja për të cilin publiku e dënon.
