Është një ditë e trishtë e sotmja në familjen e pedagoges dhe aktivistes, Iris Luarasi, e cila ka humbur babain e saj. Lajmin e hidhur e ka bërë me dije vetë Luarasi me anë të një postimi në rrjetet sociale, ku zemërthyer, shkruan një dedikim me fjalë të ndjera dhe plot dashuri për babin, i cili mësohet se është larguar nga jeta pas një beteje me një sëmundje të rëndë.
Pedagogia e njohur shkruan në postimin e saj se njerëzit e tij të dashur e kishin të vështirë të besonin që Zoti e ka thirrur pranë vetes babain e saj, ndërsa e quan atë mentorin e jetës, me të cilin udhëton një pjesë e shpirtit e të gjithë familjarëve të tij. Luarasi thotë se po lufton me dhimbjen sepse donte që ai të qëndronte edhe pak këtu, e nëse do ta kthente kohën pas dhe do dëgjonte zërin e tij, do t’i thoshte se është babai më i mirë nga gjithë. Ndërkohë ajo bën me dije edhe si do të organizohet ceremonia e lamturiës për të atin, e diktuar nga rregullat strikte të pandemisë, por edhe pritja e ngushëllimeve.
Postimi i plotë i Luarasit:
“Asnjë nga ne të dashurit e tu, sot nuk e besonte se sot Zoti do të thërristë pranë vetes e ne mëngjesi do të na gjente pa ty. I dashuri e mentori ynë, na ke thyer zemrën e një pjesë e shpirtit tonë sot udhëton me ty. Aty ku ka dhimbje të madhe, ka dashuri të madhe e ne do na mungojë buzëqeshja jote, të qeshurat e tua, e mbi të gjitha prania jote.
Sot ëngjëjt të thirrën lart se kuptuan atë që ti po kaloje e që na kishe porositur se nuk do doje të vuaje. Luftojmë të gjithë sot me dhimbjen tonë, se të gjithë të donim këtu e të rrije pak më shumë me ne. Nëse do mundeshim të kthenim kohën pas e të dëgjonim edhe njëherë zërin tënd, do të të thonim se ti ishe babai më i mirë nga të gjithë e askush nuk mund ta zërë vendin tënd.
Duke respektuar rregullat familjarë të afërt ju njoftojmë se përcjellja e babit bëhet sot në orën 14:00 nga Funeral Alba 2000 për në varrezat e Sharrës.
Për shkak të situatës do presim në orar të kufizuar ditën e martë nga ora 10:00 deri ne 13:00 dhe 17:00 deri në 19:30 tek Hotel Rogner. Mirëkuptojmë çdokënd që nuk e ka mundësinë.”
