“Dua të të bëj të lumtur” i ishte dedikuar tërësisht dashurisë mbrëmjen e sotme, nisur nga Shën Valentini, që është ditën e nesërme. Një nga historitë që ka emocionuar më shumë ndjekësit ishte ajo e Vilmës dhe Elvisit.
Vilma fatkeqësisht pas një aksidenti automobilistik të tmerrshëm humbi aftësinë për të ecur, duke u ulur përgjithnjë në një karrige me rrota. Megjithatë, nuk e humbi kurrë shpresën dhe optimizmin për jetën. Ajo tregoi se falë rrjeteve sociale arriti të njihej me Elvisin në Facebook, ku edhe nisi njohja e tyre. Dy të dashuruarit kanë folur me njëri-tjetrin për disa javë, por Vilma nuk merrte guximin t’i tregonte Elvisit faktin se ajo s’mund të ecte. Kjo pasi i trembej paragjykimit nga ana e tij.
Megjithatë, ai e mësoi të vërtetën në takimin e tyre të parë, dhe e kundërta ndodhi. Aftësia ndryshe e Vilmës nuk e pengoi atë ta donte me gjithë qenin e tij. Ndonëse, prindërit dhe njerëzit e afërt e kanë kundërshtuar këtë lidhje, ata nuk kanë hequr dorë nga njëri-tjetri. Përtej çdo paragjykimi, vështirësie e problemesh, çifti kanë arritur të jenë në krahët e njëri-tjetrit dhe të lumtur.
Prej dy vitesh çifti bashkëjeton në Tiranë dhe ka plane edhe për zgjerimin e familjes. Vilma zgjodhi programin “Dua të të bëj të lumtur” për të falenderuar dashurinë e jetës së saj, Elvisin. Teksa kësaj surprize i’u bashkuan edhe dy idhujt e saj më të mëdhenj: Alban Skënderaj dhe Miriam Çani.
