Përgatitjet për edicionin e gjashtë të “Big Brother VIP Albania” duket se kanë nisur dhe bashkë me to po qarkullojnë edhe emrat e parë që mund të bëhen pjesë e spektaklit.
Një prej surprizave më të mëdha mund të jetë Alketa Vejsiu, emri i së cilës po diskutohet për një rol të rëndësishëm në edicionin e ardhshëm të reality show-t.
Sipas informacioneve që po qarkullojnë, moderatorja mund t’i bashkohet “Big Brother VIP Albania 6” në rolin e opinionistes, ndërsa palët mësohet se janë ende në fazën e diskutimeve. Për momentin nuk ka një konfirmim zyrtar nga Top Channel apo nga vetë Vejsiu.
Nëse marrëveshja konkretizohet, do të bëhej fjalë për një nga lëvizjet më interesante televizive të sezonit të ri. Alketa Vejsiu prej vitesh është një nga figurat më të njohura të ekranit shqiptar dhe është identifikuar me disa prej produksioneve të mëdha televizive dhe muzikore.
Ndërkohë, Ledion Liço pritet të vazhdojë në drejtimin e “Big Brother VIP Albania” edhe në edicionin e gjashtë, ndërsa konfigurimi i plotë i skuadrës që do ta shoqërojë në studio ende nuk është bërë publik.
Një tjetër pikëpyetje lidhet me datën e nisjes. Nëse edicionet e fundit kanë nisur gjatë periudhës së dhjetorit, për “BBVIP 6” po qarkullon mundësia e një starti më të hershëm. Edhe ky informacion mbetet ende i pakonfirmuar.
Në javët në vijim pritet të mësohet nëse Alketa Vejsiu do të bëjë vërtet lëvizjen surprizë drejt “Big Brother VIP Albania” dhe kush do të plotësojë skuadrën e edicionit të gjashtë.
