Pas më shumë se 5 vjet përpjekje nga Autoriteti i Mbikëqyrjes Financiare tashmë është zyrtarizuar projektligji për sigurimin e detyrueshëm të mjeteve.
Drafti ka nisur shqyrtimin në komisionet e posaçme parlamentare dhe sjell një sërë risish, ku ndër më kryesoret kanë të bëjnë me rritjen e vlerës së dëmshpërblimeve dhe shkurtimin e afateve të marrjes së tyre.
Sipas projektligjit, tashmë dëmshpërblimet për dëmet ndaj personave do të bëhen brenda 90 ditëve , ndërsa ato ndaj pronës janë parashikuar të kryhen nga kompanitë brenda një periudhe 30 ditore.
Ndërsa më i reduktuar është parashikuar afati për dëmet me vlerë të vogël deri në 100 mijë lekë brenda 14 ditësh.
Komisioni i Veprimtarive ka miratuar këtë draft, por ka propozuar një rritje të afatit nga 3 në 6 muaj për hartimin e rregulloreve dhe akteve nënligjore që do ta shoqërojnë atë.
Përmes këtij ligji, tashmë mund të kërkojnë dëmshpërblim nga kompanitë edhe personat që dëmtohen nga mjetet e pasiguruara, diçka që nuk ka funksionuar deri më tani.
Dëmshpërblim në rast aksidenti në transportin publik përfitojnë edhe pasagjerët me një rritje progresive të tyre , që sipas projektligjit rastet e mbulimit përcaktohen në 2 milionë lekë në rast vdekje, 4 milionë lekë në rast paaftësie të përhershme ëpr punë si dhe në 1 milionë lekë për paaftësi të përkohshme për punë dhe trajtimet mjekësore.
Me hyrjen në fuqi të këtij ligji synohet edhe ulja e automjeteve të pasiguruara në qarkullim. Në rast se këto të fundit nuk kanë kryer pagesën për një policë sigurimi, nuk do të mund të bëjnë kolaudimin apo atë që njihet ndryshe si kontrolli teknik i mjeteve.
