Këtë vit, për Halloween u publikua traileri i filmit të parë shqiptar i zhanrit horror, i quajtur “Lugina e Djalit”, që së shpejti do ta kemi edhe në kinematë tona. Aktori dhe producenti, Ergys Keta, ka marrë përsipër të realizojë një produksion të mirëfilltë të një filmi shqiptar, duke i besuar Bujar Asqeriut dhe talenteve të rinj në aktrim.
Për të folur më shumë lidhur me të, idenë fillestare, subjektin dhe për të treguar se kur do të shfaqet filmi për të gjithë publikun e gjerë, kanë qenë të ftuar në emisionin “Jeto me Orën”, producenti Ergys Keta, së bashku me regjisorin Edi Gjerani dhe aktoren Enxhi Haxhiu.
Filmi bën fjalë për të shkuarën dhe për të tashmen që kryqëzohen mes tyre. Dhe kur kjo ndodh, gjëra të këqija do pasojnë. Fabula lidhet me një grup të rinjsh që shkojnë në kamping në një vend larg të përditshmes, ku takohen me një vajzë, që është kontakti me “të keqen e dikurshme”. Gjithçka nis në vitet ’60 dhe vjen deri në ditën e sotme. Shumë prej të rinjve sakrifikohen në kasaphanën që krijohet dhe përtej përpjekjeve të liderit të grupit për t’i shpëtuar, vetëm disa prej tyre mbijetojnë.
Producenti tha se për idenë fillestare ishte ndikuar nga fakti që në vendin tonë nuk kishte asnjë film të mirëfilltë të këtij zhanri.
“Duke parë shumë filma, që nga fëmijëria deri tani, dhe duke parë që në vndin tonë nuk ka asnjë film horror, pse të mos provoja në risi”, tha ai.
“Bashkë me shokun tim po shkruanim diçka, u prezantova me Edin(regjisorin), dhe ai pasqyroi gjithçka, nga fillimi deri në fund, bashkë me skenarin dhe regjinë, ndërsa ideja është e imja nga fillimi në fund”, shtoi Ergys Keta, që krahas rolit të producentit, në film vjen edhe si aktori protagonist.
Kur folën për vështirësitë gjatë xhirimeve, sidomos në një film të këtij zhanri, ata thanë se kanë sakrifikuar shumë dhe terreni ua ka vështirësuar punën.
“Kemi xhiruar edhe në borë, në temperaturën minus 20 gradë, pa zjarr, thjesht kemi xhiruar nga dëshira e madhe pë të bërë diçka, kemi sakrifikuar shumë”, tha producenti, megjithatë tha se ka dalë diçka e bukur për publikun shqiptar. Ai zbuloi se kanë xhiruar në male, në Shqipëri dhe Kosovë, madje në disa prej tyre, vetëm kafshët shkojnë, jo makinat, duke veçuar Qerretin, në Elbasan.
Sa i i përket rolit të tij në film, Ergys Keta tha se i përshtatet jetës së tij të përditshme, përtej skenës së xhirimeve.
“Arte marciale, boks, lidhet me karakterin. Si Ergys jam futur në rol, jo si Toni”, tha ai, referuar emrit të personazhit dhe shtoi se ndryshe nga të tjerët, ka marrë pjesë më parë në filma, dhe për të ishte disi më e thjeshtë.
Madje aktorja, Enxhi Haxhiu, zbuloi një “sekret”, një skenë e Ergysit që qan, kishte bërë edhe pjesën tjetër e kastit të qante, me natyrshmërinë gjatë xhirimeve.
Megjithatë, të tre ata, regjisori Edi Gjerani, producenti Ergys Keta dhe aktorja Enxhi Haxhiu, treguan se kanë patur një frymë bashkëpunimi në grup, që ua ka lehtësuar punën, madje se kanë patur edhe shumë momente gazmore.
Sa i përket impaktit në publik, pas publikimit të trailerit, Ergysi tha se është çuditur nga impakti.
“Më kanë shkruar pa fund njerëz, që e pëlqejnë horrorin, nga 17 deri në 30 vjeç vdesin për horrorin, unë nuk e dija këtë”, tha ai, duke shtuar se as vetë nuk është fans i horrorit, por i dramës, aksionit.
Të gjithë këtë realizim, të këtyre përmasave, dhe një risi në kinematografinë shqiptare, Ergysi e ka marrë përsipër ta realizojë vetëm, duke e financuar të gjithin vetë ai.
Por kur do ta shohim në kinema? Ata treguan se dëshirojnë të finalizohet puna para fundvitit, megjithatë siç thanë, një punë e këtij niveli kërkon shumë kohë.
Ndaj jemi të sigurtë, se “Lugina e djalit” nuk e presin vetëm ata që janë adhurues të filmave horror, pasi të gjithë jemi kuriozë të shohim të parin produksion të këtj zhanri në vendin tonë.
