Drejtori i Përgjithshëm i Qendrës Kombëtare të Urgjencës Mjekësore, Skënder Brataj u shpreh se masat që mori Këshilli i Ekspertëve të Shëndetësisë nuk u morën vetëm se doli nënlloji i virusit Covid në Angli, por siç tha ai “këto ishin masa të parashikuara më parë”.
“Këto masa u morën pasi në prang të festave të fundvitit do të kishte mundësi grumbullimi më shumë dhe i kishim studiuar me kohë disa masa të tjera që do duhet të merren në këtë periudhë dhe ndërkohë rastisi edhe virusi nga Anglia”, u shpreh ai në një studio televizive.
Brataj theksoi se “ne kemi parë gjatë gjithë pandemisë se nëse lirohen masat kemi rritje të kurbës së përhapjes së virusit dhe sapo merren masat shtrënguese kemi ulje të kurbës së përhapjes”.
“Kështu që ky është një proces dinamik që po e ndjekim me vëmendje”- tha ai.
Brataj theksoi se tashmë kemi kuptuar që gjëja më e sigurt është se virusi transmetohet nga mosmbajtja e distancës, duke apeluar për ruajtjen e distancimit fizik dhe mbajtjen e maskës.
Brataj tha se “mutacionet e virusit covid kanë qenë dhe do të jenë”. Po, e rëndësishme sipas tij është që deri tani rezulton se ai nuk e ka rritur virulencën dhe sëmundshmërinë. “Ky virus është parë që në shtator dhe nuk është i këtyre ditëve”, u shpreh Brataj.
“Mutacionet e Covid nuk shkaktojnë sëmundje më të rëndë apo sëmundje tjetër” tha ai.
“Nuk ka prova që virusi i shfaqur në Angli të ketë sëmundshmëri më të madhe. Janë 4 muaj që do të kishte dhënë rezultate. Ndërkohë që vihet re se që nga shfaqja e Covid e deri tani ne po shohin se format klinike të virusit janë më të zbutura”- shpjegoi Brataj.
“Është i panjohur dhe përhapet më shpejt prandaj merren masa, por nuk ka vend për panik” – deklaroi ai.
