Ministrja e Arsimit, Evis Kushi, njoftoi para pak ditësh se pushimet e dimrit për shkollat do të zgjasnin më gjatë këtë vit për shkak të zhvillimit të pandemisë. Ajo u shpreh se nxënësit nuk do të ktheheshin në banka në 4 janar, por 1 ose 2 javë më vonë, por vendimi nuk ishte marrë ende.
“I vetmi sinjal që kemi është që pushimet dimërore do të jenë më të gjata. Akoma nuk e kemi vendosur nëse do të jetë 11 apo 18 janar fillimi i shkollës. Theksoj se dinamika e pandemisë do të ndikojë në vendimmarrje”, tha Kushi në ABC News.
Ndërkohë sot ministrja ishte e pranishme në vizitën e kryeministrit Zaev në bashkinë e Pustecit dhe aty dha lajmin se shkolla do të rinisë në datën 11 janar. Kushi u shpreh se është konsultuar me Komitetin e Ekspertëve dhe më pas vendosi që nxënësit e mësuesit të kthehen në këtë datë në shkolla.
“Në bashkëpunim me Komitetin e Ekspertëve kemi vendosur që pas pushimeve të fundvitit shkolla të nisë në datën 11 janar dhe jo në 4, siç parashikonte urdhri i mëparshëm”, tha Kushi.
Kujtojmë se prej datës 1 dhjetor në shkolla ka nisur mësimi i alternuar, me prani fizike në shkollë dhe online. Ndërsa studentët janë detyruar që gjatë këtij viti të mësojnë online për shkak të situatës nga pandemia.
