Këtë të premte nis muaji i madhërueshëm i Ramazanit. Kreu i Komunitetit Mysliman të Shqipërisë, Bujar Spahiu uroi të gjithë besimtarët dhe bëri apel që të gjitha ritet e këtij muaji të kryhen në shtëpitë e tyre, për shkak të situatës së koronavirusit.
Nga ana tjetër, ai u shpreh, se në këtë muaj, të gjithë t’i gjendemi pranë njerëzve në nevojë. “Situata e krijuar nga Covid-19 na ka detyruar që Ramazanin këtë vit ta përjetojmë kryesisht brenda një rrethi të ngushtë dhe familjar.
Me shpresën dhe lutjet që tubimet për teravi, namaze nate dhe përjetimi i këtij muaji me xhemat të kthehet sa më shpejt. Iftaret tona të përvitshme le ti kthejmë në ndihma për familjet në nevojë.
Të nderuar vëllezër dhe motra besimtare, kudo që gjendeni, lus Allahun të na e pranojë agjërimin, adhurimet dhe veprat e mira, ky muaj na sjelltë begati, mirësi, paqe në familjet tona, dhe në mbarë shoqërinë.
Lus Zotin që kjo situatë e krijuar nga Koronavirusi të largohet sa më shpejt dhe të rikthehemi sërish tek përjetimi i namazeve në xhami, iftareve të përbashkëta dhe takimeve vëllazërore” tha me këtë rast Kreu i Komunitetit Mysliman të Shqipërisë, Bujar Spahiu.