Sezoni i ri televiziv sjell ndryshime edhe në mëngjesin e Top Channel. “Wake Up” rikthehet në ekran me një treshe të re prezantuesish, ndërsa Blendi Salaj vijon të mbetet figura qendrore e programit.
Krah tij këtë sezon do të jenë Edea Demaliaj dhe Nikol Projko, dy prezantueset e reja që i bashkohen studios së “Wake Up”.
Për Blendi Salajn ky është viti i pestë në autorësinë dhe drejtimin e programit, ndërsa ardhja e dy moderatoreve shënon risinë kryesore të formulës së këtij sezoni.
“Wake Up” do të vazhdojë të transmetohet çdo mëngjes nga e hëna në të premte, duke nisur në orën 07:00, njëkohësisht në Top Channel dhe Top Albania Radio.
Dy fytyra të reja për mëngjesin e Top Channel
Zgjedhja e Edea Demaliajt dhe Nikol Projkos duket se synon t’i japë programit një energji të re, pa ndryshuar identitetin bazë të formatit.
Informacioni, intervistat, muzika dhe lojërat do të vazhdojnë të jenë pjesë e programit, së bashku me ndërveprimin me publikun që e ndjek si në televizion, ashtu edhe në radio.
Vetë Top Channel e përkufizon formulën e “Wake Up” si një program që synon të jetë njëkohësisht i çlirët dhe i sofistikuar, inteligjent dhe popullor.
Por ndryshimi i dy figurave në krah të Salajt do të jetë edhe prova e parë e sezonit: sa shpejt do të arrijë treshja e re të krijojë kimi në transmetimin live, një element veçanërisht i rëndësishëm për një program të përditshëm mëngjesi.
Top Channel po ndryshon disa prej fytyrave të ekranit
Riformatimi i “Wake Up” vjen në një sezon ku Top Channel po ndërmerr një sërë lëvizjesh në programacion.
Nga ndryshimet e mëdha në “Fiks Fare”, te rikthimi i Agron Llakajt në drejtimin e “Portokalli”, tashmë edhe mëngjesi i kanalit merr një konfigurim të ri.
Në rastin e “Wake Up”, megjithatë, televizioni ka zgjedhur vazhdimësinë te drejtimi dhe ndryshimin te ekipi: Blendi Salaj mbetet në krye, ndërsa Edea Demaliaj dhe Nikol Projko janë dy emrat që do të duhet të fitojnë publikun e mëngjesit.
Se si do të funksionojë kombinimi i ri do të shihet me nisjen e transmetimeve, por Top Channel e ka bërë tashmë të qartë formulën: Blendi Salaj + dy fytyra të reja për sezonin e ri të “Wake Up”.
