Bashkëprezantimin me Anjeza Majën në programin “Në shtëpinë tonë” në Top Channel, Flori Agalliu e priti me shumë qetësi. I mësuar tashmë me ekranin dhe me publikun, aktori dhe moderatori i njohur nuk i druhej ndonjë sfide të jashtëzakonshme në një format të panjohur, madje ishte mësuar edhe në të njëjtën punë me bashkëshorten, Renisën, ndonëse jo në të njëjtin program.
Ndoshta kjo ishte “sfida” më e madhe e Florit pas rikthimit në Top Channel. Për Renisën, ky është viti i tretë si autore e këtij emisioni, ndërsa Flori, si hyrja më e re, i duhet të përshtatej me pjesën tjetër.
Pak javë më parë, sapo u mësua lajmi se Flori do të rikthehej në Top Channel, në një intervistë për Who, ai tha se “për mua nuk do të jetë hera e parë që do të punojmë bashkë. Kemi punuar dhe herë të tjera bashkë në Top Channel. Gjërat i kemi të ndara dhe secili ka pozicionin e vet. Nuk do të pretendoja kurrë të hyja në kompetencat e saja sikundër ajo në të miat. Dhe mendoj që ka për të qenë shumë mire… Ajo do të kujdeset që në asnjë moment të mos harrojë të më flasë për punën…”
Po tani që puna ka filluar, a kanë filluar problemet e para?
I ftuar pasditen e sotme në “Pop Culture”, Flori ndau me publikun emocionet pas çmimit të fundit si Aktori më i Mirë jo protagonist në shfaqjen “39 hapa”, por rrëfeu gjithashtu edhe disa prej prapaskenave pak javë pasi ka nisur “Në shtëpinë tonë”. Pyetjes së Dojnës “A kanë nisur problemet e para me bashkëshorten?”, ai i ktheu një përgjigje të menjëhershme me humor: “Po ti pret që unë të them se kemi probleme?”
Por, në të vërtetë, Flori shtoi se gjithçka e kishte pritur më keq: “Nuk e prisja, në fakt, e prisja që të shkonte edhe më keq. Prisja ndonjë ulërimë: “Pse nuk e bën këtë? Po pjesën e sherreve e kemi lënë në shtëpi, në punë jemi më të qetë…”
Tani që edhe mami, edhe babi janë në të njëjtën punë, edhe Mia, vajza e Florit dhe Renisës, është më komode. Di të thotë shumë mirë ku punojnë mami dhe babi (te Top Çeni), madje nuk është xheloze as për Anjezën, shkon shumë mirë edhe me të.
