Në një lidhje në emisionin “Opinion”, kreu i Urgjencës Kombëtare Skënder Brataj, tha se hapje duhet të kryhet me faza, nisur edhe nga fakti që inkubacioni i virusit është një periudhë të paktën dy javore.

Brataj nuk i cilësoi të ekzagjeruara masat e marra nga shteti shqiptar, ndërsa tha se ka qenë pikërisht efekti i tyre që solli në këtë rezultat, ndërsa tha se ai nuk dëshiron të gjendet në situatën që të zgjedh cilin pacient do shpëtojë.

“Inkubacioni është dy javë, ndaj dhe fazat e lirimit janë me afat dy javor, nuk mund të kemi hapje të menjëhershme. Unë si mjek nuk dua të gjendem asnjëherë në situatën që të zgjedh kë do shpëtoj. Ndoshta ne jemi në një moment që shumë kushte na favorizojnë dhe do të lehtësohen masat”, tha Brataj.

Fevziu: Në gjykimin tuaj a e kemi ekzagjeruar me rrezikun?

Brataj: Jo nuk e kemi ekzagjeruar sepse kemi këto rezultate, po të kishim 400 të vdekur nuk do na shkonte mendja të flisnim për ekzagjerim.

Fevziu: A vlen gjithë kjo mbyllje e madhe , në raport me kaq dëme sa ka patur në Shqipëri?

Brataj: Ky virus vjen për herë të parë, nuk e njohim. Që ti të arrish imunizimin duhet të kalosh 70 apo 80 përqind, nuk është gripi që vjen çdo vit dhe kap 10%. Ne nuk e dimë akoma përfundimin e kësaj sëmundjeje, sa është vdekshmëria , kush është terapia, nuk kemi një vaksinë.

Fevziu: Si shpjegohet që nuk patëm një kurbë të ngritur? A ka ndikuar vaksina e tuberkulozit apo e shkuara e popullit shqiptar?

Brataj: Ne flasim me çfarë njohim, ato janë të gjitha hipoteza. Përgjithësisht Ballkani ka një infektivitet më të ulët se sa Europa dhe bota. Çdo virus që del krijon edhe shtamet ose mutacionet. Derisa nuk e kemi të faktuar, unë mendoj që është një faktor, por mendoj se masat e marra e ndikuan këtë kurbë. /